/Kazinform/. Францын Альпийн нуруунд 2030 онд болох өвлийн Олимпын наадмын спортын төрлүүдийн жагсаалт ба уралдаан тэмцээний хөтөлбөрийг Олон улсын Олимпын хорооны /ОУОХ/ Гүйцэтгэх зөвлөл баталжээ.

Хөтөлбөрт цанын ба сноубордын фрирайд төрөл, синхрон уран гулгалт гэх мэт төрлүүд шинээр багтсан байна. Харин цанын хоёр төрөлт орсонгүй. Нийтдээ гурван шинэ төрөл, 16 шинэ уралдаан тэмцээнийг хөтөлбөрт оруулсан байна. Биатлон, тэшүүр, цана ба сноубордод шинээр төрлүүд нэмэгдсэн ба ски-альпинизм гэдэг шинэ төрөл бий болжээ. Тодруулбал, биатлоны спортод холимог ганцаарчилсан буухиа, тэшүүрийн спортод эрэгтэйчүүдийн ба эмэгтэйчүүдийн багийн богино зайн уралдаан, фристайлын спортод багийн холимог ски-кросс, сноубордын спортод багийн холимог төрөл, трамплин үсрэлтэд эмэгтэйчүүдийн багийн уралдаан, цанын ба сноубордын спортод фрирайдын төрөл, түүнчлэн синхрон уран гулгалтын төрөл тус тус нэмэгдэн оржээ.

Өмнө нь нэмэлт шинэ төрөл хэмээн батлагдаад байсан ски-альпинизм гэдэг төрөлд эмэгтэйчүүд болон эрэгтэйчүүд ганцаарчилсан ба спринт, холимог буухиа төрлүүдээр өрсөлдөнө.

Мөн 2030 оны Олимпод өрсөлдөх тамирчдын хүйсийн харьцааг түүхэнд анх удаа тогтоолоо. Олимпод нийтдээ 3046 тамирчин оролцохоос 1525 нь эмэгтэй, 1521 нь эрэгтэй байх юм. Мөн тамирчид 126 иж бүрдэл медалийн төлөө өрсөлдөхөөс 56 нь эмэгтэйчүүдийн төрөлд, 55 нь эрэгтэйчүүдийн төрөлд, 15 нь холимог төрөлд олгох медалиуд ажээ.

Түүнчлэн ОУОХ-ны Гүйцэтгэх зөвлөл спортын байгууламжуудын ерөнхий төлөвлөгөөг баталжээ. Ски-альпинизмын уралдаанууд Монженеврт болох бөгөөд ингэснээр Бриансон дахь Олимпын тосгон ба бэлэн байгаа спортын дэд бүтцийг ашиглах боломжтой. Олимпын байгууламжуудыг илүү үр дүнтэйгээр ашиглахын тулд Паралимпын тоглолтын объектуудын төлөвлөгөөнд оруулах өөрчлөлтүүдийг хэлэлцэн баталжээ.