Завхан аймгийн Улаагчны Хар нуурын байгалийн цогцолборт газраас гидробиологийн мониторингийн судалгааг ШУА-ийн Биологийн хүрээлэнтэй хамтран хийж, нуурын усны болон ёроолын амьтдын төрөл зүйл, тархалт, экологийн онцлогийг тогтоожээ.

Судалгаагаар Улаагчны Хар нуурын байгалийн цогцолборт газрын Хар нуурт 59 зүйлийн хөвөгч амьтан бүртгэгдсэний дотор хүрд хорхой 34, салаа сахалт хавч 14, сэлүүр хөлт хавч 11 зүйл байгааг тогтоов. Мөн 9 зүйлийн хүрд хорхой, 4 зүйл салаа сахалт хавч, 4 зүйлийн сэлүүр хөлт хавчийг шинээр илрүүлжээ.

Түүнчлэн Монгол орны ховор хөвөгч амьтдад тооцогдох Pleuroxus annandalei, Eucyclops dumonti, Eucyclops arcanus, Polyarthra luminosa, Synchaeta stylata, Synchaeta oblonga зэрэг зүйл шинээр бүртгэгдсэн байна.

Нуурын ёроолын амьтдын судалгаагаар 5 ангийн, 8 баг, 12 овгийн 44 зүйл илрүүлсэн бөгөөд хирономид ялааны авгалдай хамгийн олон төрөлтэй байгааг тогтоожээ. Мөн нуурын 13-33 метрийн гүнд ховор тархацтай Chironomus nirgocaudatus, Lauterbornia coracina зэрэг хоёр зүйлийн авгалдай амьдарч буйг илрүүлсэн байна.

Судалгаагаар Улаагчны Хар нуур нь загасны авгалдай, өсвөр загасны тэжээл болох фитопланктон, ёроолын хөвд, хар замгаар баялаг болохыг тогтоожээ.

Мөн нуурт 16 овог, 18 төрөл, 28 зүйлийн усны ургамал 20 метр хүртэлх гүнд тархан ургадаг болохыг тогтоосон талаар аймгийн Байгаль орчны газраас мэдээлэв.