Илон Маск саяхан өөрийн Tesla болон SpaceX компаниудын хамтарсан чип үйлдвэрлэх томоохон төлөвлөгөөгөө танилцууллаа. Bloomberg агентлагийн мэдээлснээр, Маск өнгөрөгч бямба гарагийн орой Техас мужийн Остин хотод болсон арга хэмжээний үеэр энэхүү төлөвлөгөөгөө хуваалцсан байна. Түүний "Terafab" гэж нэрлээд буй уг үйлдвэрийг Tesla-ийн Остин дахь төв оффис болон "гига үйлдвэр"-ийн ойролцоо барих төлөвтэй байгааг тэнд дэлгэсэн зураг харуулжээ.
Маск энэхүү төслийг хэрэгжүүлэх болсон шалтгаанаа тайлбарлахдаа, хагас дамжуулагч үйлдвэрлэгчид түүний компаниудын хиймэл оюун ухаан болон робот техникийн хэрэгцээнд шаардлагатай чипийг хангалттай хурдан үйлдвэрлэж чадахгүй байгаатай холбон тайлбарлав. Тэрээр "Бид Terafab-ийг барихгүй л бол чипгүй болно. Харин бидэнд чип хэрэгтэй байгаа учраас Terafab-ийг барих болно" гэж хэлжээ.
Энэхүү төслийн зорилго нь дэлхий дээр жилд 100-200 гигаватт, харин сансарт нэг тераватт тооцоолох хүчин чадлыг дэмжих чадвартай чип үйлдвэрлэх явдал юм гэж Маск онцолсон байна. Гэхдээ тэрээр уг төлөвлөгөөг хэзээ хэрэгжүүлж дуусах талаар тодорхой хугацаа дурдсангүй.
Bloomberg-ийн тэмдэглэснээр, Илон Маскт хагас дамжуулагч үйлдвэрлэлийн чиглэлээр туршлага байхгүй хэдий ч тэрээр өмнө нь зорилго, хугацааныхаа талаар хэтрүүлэн амлаж байсан түүхтэй билээ.
