Дэлхийн усны өдрийг жил бүрийн 3 дугаар сарын 22-ны өдөр цэвэр усны нөөцийг хамгаалах, тогтвортой менежментийг сурталчлах, ундны усны ач холбогдлыг таниулах зорилгоор тэмдэглэдэг.
Энэ жил дэлхий даяар "Ус ба тэгш эрх" уриан дор тэмдэглэж, усны хүртээмжид эмэгтэйчүүд, охидын оролцоог нэмэгдүүлэх чиглэлд анхаарч байна.
Говийн экосистем болон нутгийн иргэдийн амьдралд ус амин чухал нөөц юм. Иймд усны хэрэглээ ихтэй байгууллага, аж ахуйн нэгжүүдэд усны ач холбогдлыг зөв ойлгуулах, усыг хэмнэлттэй, зохистой хэрэглэх дадлыг хэвшүүлэх шаардлагатай байна. Мөн усыг дахин ашиглах дэвшилтэт арга, технологийг нэвтрүүлж, гадаргын усны нөөцөд тулгуурлан говийн бүсийг усжуулах ажлыг идэвхтэй зохион байгуулахыг уриалж байна.
Өмнөговь аймаг орон нутгийн төсвийн хөрөнгө оруулалтаар 9 хөв, цөөрөм байгуулсан бөгөөд “Говь-Ус” хөтөлбөрийн хүрээнд 14 тэрбум төгрөгийн хөрөнгө оруулалтыг үе шаттайгаар хэрэгжүүлж байна. Үүний үр дүнд бүх сумыг найдвартай ундны усаар хангах ажлыг эрчимтэй зохион байгуулж байна.
Хөв, цөөрмийг олноор байгуулснаар байгалийн тэнцвэрийг хадгалах, ан амьтдын усны хэрэгцээг хангахын зэрэгцээ усны нөөцийг хуримтлуулж, хамгаалах боломж бүрдэж байна. Энэ нь уур амьсгалын өөрчлөлтийн эсрэг чиглэсэн бодит, үр дүнтэй ажил юм. Орон нутгийн усны эх үүсвэрүүдийг хамгаалснаар уул уурхай, байгаль орчин, орон нутгийн иргэд хамтдаа тогтвортой хөгжих нөхцөлийг бүрдүүлэхэд чухал ач холбогдолтой.
Тодруулбал, 13 мянган хүнийг цэвэр усаар хангах хүчин чадалтай Ханбогд сумын төвийн ус хангамжийн цогцолборыг 6.9 сая ам.долларын хөрөнгөөр байгуулж, бэлчээрийн усжуулалтыг сайжруулах хүрээнд 2011 оноос хойш 161 гар худгийг сэргээн засварлаж, гүн өрөмдлөгийн болон технологийн зориулалттай нийт 50 худагт нарны толь суурилуулж, 12 худгийн байгууламжийг шинээр барьж,сайжруулснаар орон нутгийн малчдын ундны усны хүртээмжийг нэмэгдүүлсэн талаар Оюу толгой компаниас мэдээллээ.
