“Ур чадварын олимп” хэмээн нэрлэгддэг WorldSkills Competition буюу дэлхийн ур чадварын 48 дахь удаагийн уралдаан 2026 оны есдүгээр сарын 22-27-нд БНХАУ-ын Шанхай хотод зохион байгуулагдахаар болжээ. Энэхүү нэр хүндтэй тэмцээн нь мэргэжлийн болон техникийн боловсрол эзэмшиж буй залуусын ур чадварыг олон улсын тавцанд сорих, илэрхийлэх, дэлхий нийтэд таниулах ховор боломжийг олгодог.
Дэлхийн 89 орныг нэгтгэсэн WorldSkills International байгууллага энэхүү тэмцээнийг хоёр жил тутамд зохион байгуулдаг бөгөөд оролцогч орнуудын хувьд зөвхөн залуусын гүйцэтгэл бус, багш, бодлого боловсруулагчид, төр, ТББ-уудын хамтын ажиллагаа, ур чадварын хөгжлийг ч тусгасан иж бүрэн платформ болдгоороо онцлог юм.
WorldSkills Shanghai 2026 уралдааны ерөнхий ивээн тэтгэгчээр дэлхийн технологийн тэргүүлэх компани “Samsung” ажиллах болсноор энэхүү тэмцээний цар хүрээ, дэмжлэгийн түвшин илүү өндөр түвшинд хүрнэ хэмээн үзэж байна.
Ташрамд дурдахад, “WorldSkills Lyon 2024” уралдаанд Монгол Улсаас мэргэжлийн болон техникийн боловсролын 7 суралцагч оролцсоноос 2 суралцагч “Medallion for Excellence” шагнал хүртэж, 700 онооны босгыг давсан байна. Бусад 5 оролцогч ч мөн адил 700 оноотой маш ойр түвшинд гүйцэтгэл үзүүлэн дэлхийн шилдэг залуустай эн зэрэгцэн өрсөлджээ.
Эх сурвалж: WorldSkills International, WorldSkills Mongolia.
