Домогт “Лос-Анжелес Лейкерс” сагсан бөмбөгийн клубыг бараг хагас зууны турш удирдсан Бассын гэр бүл эзэмшлээ шилжүүлэх хэлцэлд орж буйг ESPN.com мэдээллээ. Тус гэр бүл клубыг анх 1979 онд ердөө 67.5 сая ам.доллараар худалдан авч байсан бол одоо ойролцоогоор 10 тэрбум ам.долларын үнэлгээтэйгээр шинэ эзэнд шилжих гэж байна.

Шинэ эзнээр тодроод буй Марк Уолтер нь TWC Global санхүүгийн холдингийн гүйцэтгэх захирал бөгөөд 2021 он гэхэд аль хэдийн "Лейкерс"-ийн 26 хувийн хувьцаа эзэмшиж байсан юм. Одоо тэрээр клубын хяналтын багц буюу хамгийн том шийдвэр гаргах эрхийг бүрэн авах хэлцэл хийж байна. Харин Бассын гэр бүл 15 хувийн хувьцаагаа хадгалж, тодорхой хугацаанд удирдлагын багт үлдэхээр тохирчээ.

Марк Уолтер болон түүний удирддаг TWC Global нь зөвхөн “Лейкерс”-т бус, МЛБ-ийн “Лос-Анжелес Дожерс”, NBA-ийн эмэгтэй баг болох “Лос-Анжелес Спаркс”, Английн Премьер Лигийн “Челси” клуб, автомашины уралдааны багууд зэрэг олон салбарт хөрөнгө оруулалттай.

“Лейкерс”-ийг анх худалдан авсан Жерри Басс 2013 онд нас барсны дараа эзэмшлийн эрх нь зургаан хүүхдэд нь хуваарилагдаж, гэр бүлийн траст шилжсэн. Гэвч 2017 онд дотоодын зөрчлийн улмаас Жинни Басс хяналтын багцыг өөр дээрээ төвлөрүүлж, өдгөө клубын ерөнхий захирлаар ажиллаж буй.

Ийнхүү NBA-ийн түүхэн дэх хамгийн амжилттай багуудын нэг “Лейкерс” шинэ үеийн хөрөнгө оруулагчдын гарт шилжиж, бизнес, спортын шинэ чиг хандлагыг төлөөлөхөд бэлэн болж байна.

Эх сурвалж: ESPN.com, OfficeLife.media.