Португалийн Брага хотод тавдугаар сарын 31-нээс зургаадугаар сарын 1-ний өдрүүдэд зохион байгуулагдсан хореографик бүжгийн өсвөр, залуучууд, насанд хүрэгчдийн дэлхийн аварга шалгаруулах тэмцээнд Монгол Улсын баг тамирчид амжилттай оролцож, гурван насны ангилалд гурван алтан медаль хүртэн эх орондоо ирлээ.
Энэхүү түүхэн амжилт нь Монголын бүжгийн спортын түүхэнд анх удаа дэлхийн түвшинд гурван алт нэгэн зэрэг хүртсэн ховор тохиолдол болж, алтан үсгээр бичигдэх тэмдэглэлт үйл явдал болсон юм.
Тэмцээнд:
-
О.Эрдэнэ-Очир, Б.Халиун дасгалжуулагчтай “Royal dance” хамтлаг залуучууд болон насанд хүрэгчдийн ангилалд,
-
Д.Батсайхан, Б.Ууганцэцэг дасгалжуулагчтай “Star girls” хамтлаг өсвөр үеийн ангилалд тус тус алтан медалийн эзэд болжээ.
Амжилттай оролцоод ирсэн баг тамирчдыг өнөөдөр Биеийн тамир, спортын улсын хорооноос хүлээн авч уулзсан байна. Уулзалтын үеэр тус хорооны Төрийн захиргааны удирдлагын газрын дарга О.Баттулга, Спортын бодлогын хэрэгжилтийн хэлтсийн дарга Ж.Баасансүрэн, Гадаад харилцаа, мэдээллийн технологийн хэлтсийн дарга Н.Оюунбат нар хүндэтгэл үзүүлжээ.
О.Баттулга дарга хэлэхдээ:
“Хүүхэд залуусын өмнө үлгэр дуурайлал болсон та бүхэнд талархаж байна. Багш, дасгалжуулагч нарын хөдөлмөр зүтгэл, хөгжөөн дэмжигчдийн итгэл найдварыг алдаагүй тамирчдаараа бахархаж байна” хэмээн онцлон тэмдэглэсэн байна.
Эх сурвалж: Биеийн тамир, спортын улсын хороо.
