Монголын жүдо бөхийн холбооны ерөнхийлөгч Х.Баттулгын санаачилгаар үндэсний шигшээ багийн дэргэд өсвөр үеийн шигшээ багийг шинээр байгуулсан талаар албаныхан мэдээллээ. Энэ баг нь ирээдүйн олимп, дэлхийн аваргуудыг бэлтгэх эхний шатны бүтэц болж, системтэй, шат дараалсан бэлтгэлийн тогтолцоог нэвтрүүлэх зорилготой юм.

Шинээр байгуулагдсан шигшээ багийн ахлах дасгалжуулагчаар “Magic team” клубийн үүсгэн байгуулагч Ц.Тэнгис томилогдсон бол түүний туслах дасгалжуулагчаар Казахстаны гавьяат тамирчин, олимп, дэлхийн аваргын хүрэл медальт, “Winner” клубийн үүсгэн байгуулагч Г.Отгонцэцэг, мөн Азийн наадмын аварга, гавьяат тамирчин, “Хүлэг” клубийн үүсгэн байгуулагч Д.Төмөрхүлэг нар ажиллаж байна.

Энэхүү шинэ бүтэц нь өсвөрийн насны тамирчдыг зөв техник, мэх, тактикийн мэдрэмжтэй болгохоос гадна, насанд хүрэгчдийн шигшээ багтай адил төлөвлөгөө, хөтөлбөртэйгөөр үе шаттай бэлтгэл хийх үндэс суурь болно. Ингэснээр олон улсын тавцанд өрсөлдөхүйц залуу тамирчдыг төлөвшүүлж, Монголын жүдогийн залгамж халааг тогтвортой бэлтгэх боломж бүрдэх юм.

Мөн 2025 оны өсвөр үеийн жүдо бөхийн дэлхийн аварга шалгаруулах тэмцээн наймдугаар сард Болгарын Софи хотод болох тул тус шигшээ багийн анхны сорил, шалгуур уг тэмцээн байж магадгүй гэж үзэж байна.

Эх сурвалж: Монголын жүдо бөхийн холбоо