Дундговь аймгийн Засаг даргын Тамгын газар, Биеийн тамир, спортын газар болон спортын холбоод хамтран энэ сарын 8-10-нд иргэдийн спортын наадмыг амжилттай зохион байгуулж, 9 сумаас нийт 472 тамирчин оролцлоо.
Энэхүү наадам нь Монгол Улсын Засгийн газрын Бүсчилсэн хөгжлийн бодлогын хүрээнд бүс нутгийн хамтын ажиллагаа, нэгдмэл байдлыг бэхжүүлэх, иргэдийн дунд эрүүл, идэвхтэй амьдралын хэв маягийг төлөвшүүлэх зорилготойгоор хоёр үе шаттай явагдсан юм.
Анхан шатны тэмцээн Эрдэнэдалай, Гурвансайхан, Сайнцагаан сумдад бүсчлэн зохион байгуулагдаж, нийт 1300 орчим тамирчин үндэсний бөх, сур, шагайн харваа, ширээний теннис, шатар, волейбол, сагсан бөмбөг зэрэг спортын төрлүүдээр өрсөлдөж, шилдгүүдээ шалгаруулсан байна.
Хоёр дахь шатны буюу шигшээ тэмцээнд шалгарсан 472 тамирчин хүч сорин өрсөлдөж, багийн дүнгээр:
-
Сайнцагаан сум түрүүлж,
-
Гурвансайхан сум удаалж,
-
Эрдэнэдалай сум гуравдугаар байрт шалгарсан байна.
Тэмцээний дүнгээр шалгарсан 130 шилдэг тамирчин энэ сарын 16-18-нд Дорноговь аймагт зохион байгуулах Говийн бүсийн спортын их наадамд оролцох эрхтэй болж, батламжаа гардан авлаа.
Эх сурвалж: Дундговь аймгийн ЗДТГ, БТСГ
