Афганистаны эрх баригчид шатрын спортыг албан ёсоор хориглосон тухай “Khaama Press” агентлаг мэдээллээ. Энэхүү шийдвэрийг “Талибан” хөдөлгөөний байгуулсан Засгийн газрын Сайн үйлсийг урамшуулах, муу зуршлыг таслан зогсоох яамнаас гаргасан бөгөөд уг хориг “шашинтай холбоотой шалтгаан”-д үндэслэгдсэн хэмээн тайлбарлажээ.
Шатрыг хориглох шийдвэрийн хүрээнд Афганистаны Шатрын холбоо бүрэн хаагдсан бөгөөд тус спортоор холбоотой бүх үйл ажиллагааг зогсоох болсон байна. Афганистаны Спортын яамны төлөөлөгчид ч энэ шийдвэрийг баталгаажуулжээ.
Сүүлийн жилүүдэд Афганистанд шатрын спорт эрчимтэй хөгжиж, олон нийтэд түгэн дэлгэрч байсан юм. Гэвч уг шийдвэр гаргахаас хэдхэн хоногийн өмнө хэсэг идэвхтэн шатрын спортыг дэмжих, санхүүжилт олгох хүсэлтийг холбогдох байгууллагад хүргүүлсэн нь ийнхүү талаар болсон байна.
Энэхүү хориг нь Афганистаны олон нийтийн дунд төдийгүй олон улсын спортын хүрээлэлд ихээхэн шүүмжлэл дагуулах төлөвтэй байна.
Эх сурвалж: ТАСС, Khaama Press
