Жил бүр Япон улсын Миэ мужид уламжлал болгон зохион байгуулдаг олон өдрийн дугуйн “Тур де Кумано” уралдаан энэ өдөр эхэллээ. Тэмцээн тавдугаар сарын 11-нийг дуустал үргэлжлэх бөгөөд нийт 464 километрийн зайг туулах дөрвөн өдрийн уралдаан юм. Энэхүү тэмцээнд Монголын үндэсний шигшээ багийн тамирчин, Олон улсын хэмжээний мастер Б.Тэгшбаяр Тайландын “Roojai insurance” багийн бүрэлдэхүүнд өрсөлдөж байна.
“Тур де Кумано” уралдаан анх 2006 онд зохиогдож эхэлсэн бөгөөд эхний гурван жил сонирхогчдын түвшинд болж байсан бол 2009 оноос мэргэжлийн ангилалд дэвшиж, Олон улсын дугуйн холбооны албан ёсны хуанлид 2.2 зэрэглэлтэй тэмцээн болон бүртгэгджээ.
Уг тэмцээнд өнгөрсөн жилүүдэд олон шилдэг тамирчид оролцож байсан. Тухайлбал, Японы алдарт дугуйчин Юкия Араширо 2008 онд хүрэл медаль хүртэж байсан бол “Жиро Де Итали” уралдаанд “Уулын хаан”-аар тодорч байсан Колумбын Хулиан Арредондо ч мөн уралдаж байжээ.
Энэ жилийн “Тур де Кумано” тэмцээнд Япон, Итали, Малайз, Тайланд, БНСУ, Хонконг, Шинэ Зеланд, Бельгийн 19 багийн 100 гаруй мэргэжлийн тамирчид хурд хүчээ сорин өрсөлдөж байна.
Эх сурвалж: МУ-ын Үндэсний шигшээ баг, UCI.org, Roojai Insurance
