Завхан аймгийн “Цэцэн шонхор” клубийн тамирчид Олон улсын таеквондогийн өсвөр үе, залуучууд, мастер ангиллын улсын аварга шалгаруулах 30 дахь удаагийн тэмцээнд амжилттай оролцож, багийн нийлбэр дүнгээр 4-р байрт шалгарлаа. Тус клуб энэ удаагийн тэмцээнд нийт 118 тамирчнаа оролцуулсан бөгөөд тэд 16 алт, 16 мөнгө, 17 хүрэл медаль хүртжээ.

Мөн тэмцээний үеэр тус клубийн 9 тамирчин спортын дэд мастер, 1 тамирчин спортын мастер цол хүртэж, хүндтэй шагналаа гардан авсан байна. Түүнчлэн өсвөр болон насанд хүрэгчдийн ангилалд нийт 8 тамирчин дэлхийн аваргын тэмцээнд Монгол Улсаа төлөөлөн оролцох эрхээ авч, олон улсын түвшинд өрсөлдөх боломжийг олж авлаа.

Завхан аймагт таеквондогийн спортын хөгжил эрчимтэй өрнөж буй нь тив, дэлхийн хэмжээний аваргууд орон нутагтаа ажиллаж, спортыг хөгжүүлэхэд чиглэсэн идэвхтэй үйл ажиллагаа зохион байгуулж байгаатай холбоотой. Тухайлбал, дэлхийн болон Азийн хошой аварга С.Будхүү “Цэцэн шонхор” клубийг үүсгэн байгуулж, спортын таван төрлийн дотроос тулаан, эргэлттэй өшиглөлт, онцгой чадварыг түлхүү хөгжүүлэх зорилгоор тамирчдаа бэлтгэж байна.

Өнөөдрийн байдлаар Завхан аймагт таеквондогийн спортоор давхардсан тоогоор 760 гаруй хүүхэд, залуучууд хичээллэж байгаа бөгөөд аймгийн 7 сум таеквондогийн клубтэй болж, жил бүрийн аймгийн аваргын тэмцээнд оролцогчдын тоо өсч, тамирчдын ур чадвар мэдэгдэхүйц ахиж байгаа юм. Улиастай, Цагаанхайрхан зэрэг сумдад Азийн аварга тамирчид ажиллаж, орон нутгийн хүүхэд залуусыг бэлтгэж буй нь энэ спортыг орон нутагт илүү түгээмэл, тогтвортой болгоход бодит дэмжлэг үзүүлж байна.

Ази, дэлхийн аварга С.Будхүү хэлэхдээ:
“Таеквондогоор хичээллэх нь хүүхдийн бие, сэтгэлд эерэг нөлөөтэй. Тэд тэвчээртэй, зорилготой, бусдыг хүндэлдэг хүн болж төлөвшдөг” хэмээн онцоллоо.

Эх сурвалж: Завхан аймаг, Цэцэн шонхор клуб.