Монгол Улсын гавьяат тамирчин Э.Цэндбаатар энэ сарын 15-нд WBA холбооны Америк тивийн аваргын бүс хамгаалах тулаанаа “Аса Арена”-д хийх гэж байна.

Энэхүү тулаан нь монгол тамирчин эх орондоо аваргын бүс хамгаалж буй анхны тохиолдол гэдгээрээ онцлогтой. Тэрбээр АНУ-д бэлтгэлээ хангаж байгаа бөгөөд холбооны аваргын бүсээ хамгаалах тулааны өмнөхөн буюу хоёрдугаар сарын 10-нд эх орондоо ирнэ.

Түүний өрсөлдөгч – Педро Бернал Родригес
Э.Цэндбаатарын өрсөлдөгчөөр Мексикийн шилдэг залуу тулаанч Педро Бернал Родригес тодорчээ. Родригес нь 17 тулаанд 14 ялалт, нэг ялагдал, хоёр тэнцээтэй бөгөөд зургаан удаа өрсөлдөгчөө хүнд цохилтоор буулган авсан амжилттай. Мөн тэрбээр WBC холбооны хөнгөн жингийн залуучуудын дэлхийн аварга бөгөөд Мексикийн чансаанд 11, дэлхийн чансаанд 58-д бичигдэж буй шилдэг тулаанчдын нэг аж.

Н.Төгсцогт мэргэжлийн боксын рингэнд эргэн ирнэ

Энэхүү тэмцээний онцлох үйл явдлын нэг нь олимп, ДАШТ-ий мөнгөн медальт, IBO холбооны дэлхийн аварга, гавьяат тамирчин Н.Төгсцогтын рингэнд эргэн ирэлт юм. Тэрбээр 2015 онд мэргэжлийн бокст хөл тавьж, 15 тулаанд 12 ялалт, хоёр ялагдал, нэг тэнцээтэй амжилт үзүүлсэн. Өнгөрсөн хугацаанд мэргэжлийн боксоо түр завсарлаад байсан тэрбээр энэ тэмцээний үеэр эргэн ирж, олон улсын чансаа өндөр тамирчидтай хүч сорих гэж байна.

Монголын шилдэг зургаан боксчин олон улсын тулаанчидтай тулалдана

Энэхүү тэмцээнд Монголын жин тус бүрийн шилдэг зургаан боксчин олон улсын чансаа өндөр тулаанчидтай халз тулалдах бөгөөд энэ нь монгол боксчдын ур чадвар, чансааг олон улсад таниулах томоохон боломж болох юм.

Оддын тулаан – Лил Бато vs. Чойдог

Монголд боксын спортын анхны Celebrity Match буюу Оддын тулаан энэ үдэш зохиогдоно. Тус тэмцээний гол тулаанд Лил Бато болон Чойдог нар рингэнд гарч, сонирхогчдын боксын дүрмээр гурван үе тулалдах аж.

Энэхүү WBA холбооны аваргын бүс хамгаалах тулаан нь Монголын мэргэжлийн боксын спортын түүхэнд шинэ хуудсыг нээж буй чухал үйл явдал болж байна.