Уншигч бичсэн байна. АТГ-ыг яаралтай татан буулгая, ямар ч хэрэггүй. Жижиг авилгаа цагдаа нь шалгаад, том авилгачаа дэвшүүлээд явья аа гэж. Хатуу ч гэсэн үнэнд ойрхон үг.
Нэгдүгээр сургуулийн захирал Г.Бум-Эрдэнийг өнгөрөгч долоо хоногт АТГ-аас баривчлан саатуулсан. Түүнийг хүүхэд сургуульд элсүүлснийхээ хариуд бусдаас шан харамж (хахууль) авч байхад нь үйлдэл дээр нь баривчилсан тухай сүр дуулиантай мэдээлсэн. Гэвч энэ бол олон нийтийн хувьд тэгтлээ баярлаад, эсвэл гайхаад байх сэдэв биш л дээ. Угаасаа намрын намарт хүүхдээ сургууль, цэцэрлэгт оруулахын тулд бараг эцэг эх бүр хэн нэгэнд авилга өгсөөр ирсэн. Их багын хувьд л ялгаатай байх. Учир нь манайд сургууль цэцэрлэгийн хүрэлцээ муу. Ачааллаасаа даруй 50 хувь давсан. Тиймээс захын хорооллын сургуулиуд бараг бүгдээрээ гурван ээлжээр хичээллэж байна. 30 хүүхдийн багтаамжтай нэг ангид 50 хүүхэд сурдаг. Энэ илүүдэл болсон 50 хувийг шингээхийн тулд эцэг эхчүүд хэнд ч юу ч төлөхөд бэлэн.
Хоёрдугаарт боловсролын чанар муу. Тиймээс чанартай гэсэн улсын хэдэн сургуулиуддаа эцэг эхчүүд дахиад мөнгө төлнө. Үүний нэг илрэл нь сая нийслэлийн нэгдүгээр сургууль дээр болсон баривчилгаа. Олон сургууль дээр яг ийм байгаа. Гэтэл боловсролын чанарыг авч явах ёстой чиглэлийн яамд, Засгийн газар ямар ч хариуцлага хүлээхгүй байгаа нь гайхалтай. Яагаад тэд биднийг сургууль цэцэрлэгээр хангахгүй, сургалтын чанарт анхаарахгүй байгаа юм бэ?
Утаа хаашаа хийсч байгааг биш, салхи хаанаас ирж байгааг хар гэж үг бий. Сайтар бодоод үзвэл сургууль цэцэрлэгт бий болоод байгаа энэ авлига чинь эцсийн дүндээ боловсролын хүртээмж, чанар муу байгаатай л холбоотой. Харин түүнийг хийх ёстой газар нь мэргэжлийн яамд, Засгийн газар. Сургуулиа барихгүй, багш нараа чанаржуулахгүй байж “Аа чи авлига авч, өгөөд байна уу” гэж зодох нь хэтэрхий харалган бөгөөд үр дүн багатай ажил. Эцсийн эцэст авч байгаа өгч байгаа хоёр ч гэсэн “зах зээлийнхээ жамаар” асуудлаа шийдэж байгаа хэрэг. Хаана эрэлт их байна, тэнд үнэ өсөх нь дамжиггүй. Ганцхан тэр нь буруу замаар л яваад байгаа болохоос биш.
Тэгэхээр боловсролын салбарт бий болсон авлига энэ салбарт ажиллагсадтай биш, салбарын бодлого тодорхойлж байгаа эрхмүүдтэй илүү холбоотой байх нь. Сургууль цэцэрлэг нь хүүхэд бүрт хүртээмжтэй, багш нар нь цалинтай, чадвартай болсон цагт авлига үгүй болно. Түүнээс биш ганц нэг сургуулийн захирлыг барьж, хорьж “еээ еээ бөөвөө” гэж харуулснаар авилга шийдэгдэхгүй.
Б.ЗАЯА