Баянгол дүүргийн Насан Туршийн Боловсролын төв нь “Олон улсын мэргэжлийн хөгжлийн институт”-тай хамтран хүний нөөцөө чадавхжуулах үйл ажиллагааг 2021 оноос эхлүүлсэн.

Тэгвэл өнөөдөр “Насан туршийн боловсролын салбарын хөгжлийн бодлого, эрх зүйн орчин, салбарын стратеги, хүний нөөцийн чадавхыг сайжруулах нь” уулзалт хэлэлцүүлгийг хамтран зохион байгууллаа.

Өнөөдөр болсон уулзалт хэлэлцүүлэгт Баянгол дүүргийн Насан Туршийн Боловсролын Төв, орон нутгаас Архангай, Дархан-Уул, Орхон, Хэнтий, Хөвсгөл, Сэлэнгэ аймгуудын Насан туршийн боловсролын төвүүдийн удирдлагууд оролцсон бөгөөд энэ үеэр “Олон улсын мэргэжлийн хөгжлийн институт” орон нутгийн насан туршийн боловсролын төвүүдийн удирдлагуудтай хамтын ажиллагааны гэрээ байгууллаа.  

Хамтын ажиллагааны хүрээнд насан туршийн боловсролын салбарын стратеги, хүний нөөцийн бодлогын хэрэгжилтийн явц, үр дүнд дүн шинжилгээ, үнэлгээ хийх, төрийн байгууллага, албан тушаалтныг төрийн захиргааны болон хүний нөөцийн менежмент, хүний нөөцийн хөгжлийн цогц бодлого боловсруулж төрийн алба мэргэшсэн, тогтвортой, хариуцлагатай байх, төрийн ажил үйлчилгээг иргэдэд чанартай, хүртээмжтэй, шуурхай хүргэх нөхцөлийг бүрдүүлэх чиглэлээр санал солилцон цаашид хамтран ажиллахаар болж буй юм. 

Ташрамд мэдээлэхэд, Баянгол дүүргийн "Насан Туршийн Боловсролын төв" нь Олон улсын мэргэжлийн хөгжлийн институттэй хамтран хүний нөөцөө чадавхжуулах үйл ажиллагааг эхлүүлснээс хойш энэхүү хамтын ажиллагаа нь бусад төвүүдэд жишиг болохуйц үр дүнтэй хэрэгжиж байгаа бөгөөд 2022 оноос орон нутгийн насан туршийн боловсролын төвүүд өөрсдийн саналаар нэгдэхээр болж байгаа юм.