Бангладеш дахь ачааны чингэлэгийн агуулахад өнгөрсөн амралтын өдрүүдэд гал гарчээ. Тус агуулахад химийн бодис байсан тул маш том хэмжээний дэлбэрэлт болсон байна. Харамсалтай нь тухайн үед гал сөнөөгчид тэсрэх химийн бодис тэнд байсныг мэдээгүй гэж мэдэгдэв.
Химийн бодисууд хэд хэдэн хүчтэй дэлбэрэлт үүсгэсэн бөгөөд есөн гал сөнөөгч мөн гуч гаруй энгийн иргэд дэлбэрэлтийн улмаас амиа алджээ. Дэлбэрэлтийн улмаас хэдэн зуун хүн түлэгдсэн байна. Тус агуулахад экспортонд гаргах хувцас, даавууг цайруулах, будахад ашигладаг устөрөгчийн хэт ислээр дүүргэсэн поошко хадгалдаг байсан байна.
Гал түймрийн албаны ажилтан "Манай эхний баг галыг унтраахаар хэргийн газар очиход эрх баригчид дотор нь химийн бодисын талаар хэлээгүй. Хэрэв тэд үүнийг эрт хэлсэн бол ийм олон хүн үхэхгүй байх байсан" гэв.
Бангладеш сүүлийн жилүүдэд хэд хэдэн их хэмжээний гал түймэр, үйлдвэрлэлийн гамшигт өртсөн бөгөөд ихэнх нь тус улсын экспортын 80 хувийг бүрдүүлдэг оёдлын үйлдвэрүүдтэйгээ холбоотой байдаг. Оёдлын үйлдвэрүүдийн тухайд хүний эрх, хөдөлмөрийн байгууллагууд хөдөлмөрийн нөхцөл, аюулгүй байдлынх нь талаар санаа зовж байгаагаа жилээс жилд илэрхийлсээр ирсэн.
Б.Бүжлхамаа
www.nytimes.com
