БНХАУ-ын Засгийн газраас санхүүжүүлж буй мазаалай хамгаалах төсөл албан ёсоор хэрэгжиж эхэлжээ. Энэ сарын 17-ны өдөр БНХАУ-н судлаач, эрдэмтэд, Байгаль орчин, аялал жуулчлалын яамны төлөөлөлтэй уулзаж судалгаа, төслийн талаар ярилцсан байна. Төслийг хэрэгжүүлэхэд МУИС, Биологийн хүрээлэн, Мазаалай сангийн төлөөлөгчид мэргэжлийн туслалцаа үзүүлнэ.
Төслийн судалгааны хүрээнд БНХАУ-ын Ойн академийн Ойн экологийн орчныг хамгаалах хүрээлэнгийн долоон судлаач ирэх сарын 28-г дуустал Говь-Алтай аймгийн Цогт сумын нутагт байх Говийн их дархан газрын А хэсэгт хээрийн судалгаа хийж байна.
БНХАУ-ын Засгийн газраас энэ төсөлд 17.5 сая ам.долларын техникийн тусламж үзүүлж байгаа юм. Гурван жилийн хугацаанд хэрэгжих бөгөөд дууссаны дараа хулсны баавгайг хамгаалсан туршлага, арга барил зэргийг багтаасан тайланг Монгол Улсын Засгийн газарт хүлээлгэн өгөхөөр болжээ.
