Үндсэн хуулийн Цэцэд “сунардаггүй” Сугар гэж айхтар хүн байж билээ. Энэ хүний холбогдсон гэмт хэргийн тоо Үндсэн хуулийн Цэц доторх гэмт хэргийн статистик огцом өсч, Цэцийн гишүүнээс түдгэлзүүлэх асуудал нь гурван ч удаа УИХ-ын босго давсан санагдаж байна. Гэвч прокуророос УИХ руу асуудал орж ирэнгүүт Цэц өмнөөс нь хуралдаад аваад үлдчихдэг байлаа. Тэгж тэгсээр айх аюулгүй бүтэн зургаан жилийг авч, бүрэн эрхийн хугацаагаа дуусгасан даа.
Тэгсэн одоо УИХ-д мултардаггүй Мурат гэж бас нэг айхтар амьтан гараад ирлээ. Нөхрийг УИХ-д орж ирснээс болж УИХ доторх хүчингийн хэргийн гаралт хоёр дахин нэмэгдэв. УИХ-ын хоёр гишүүн хүчингийн гэмт хэрэгт холбогдсон байхад нэг нь чөлөөлөгдөх хүсэлтээ өгөөд явчихсан байхад нөгөө нь “Ерөнхийлөгчийн хоригийг дэмжиж байна” гэх шиг овойгоод, товойгоод сууж байхыг харвал жир хүн биш бололтой.
Өмнө Төрийн байгуулалтын байнгын хороогоор Д.Гантулга, Д.Мурат нарын бүрэн эрхийг түдгэлзүүлэх асуудал орж ирэхэд гишүүд Д.Гантулгыг нь түдгэлзүүлнэ, Д.Муратыг түдгэлзүүлэхгүй гэж санал өгч байлаа. Дээрээс нэг юм харсан байх. Д.Муратын бүрэн эхийг түдгэлзүүлэх шаардлагагагүй гэж үзсэн УИХ-ын тогттол Ерөнхийлөгч хориг тавьсны дараа сая Байнгын хороо хоёр дахь удаагаа асуудлыг хэлэлцтэл гишүүдийн толгой гэнэт эргээд явчив. Түдгэлзүүлэхгүй гэдэг тогтоолд хориг тавьсан юм чинь түдгэлзүүлнэ гэж тогтоол гаргах уу, гаргахгүй юу? гэж баахан амьтны толгой эргэж байгаад тарав. Дээрээс нэг юм тэдний толгойг албаар эргүүлсэн байх.
УИХ-ын гишүүн Д.Лүндээжанцан “Түдгэлзүүлэхгүй гэсэн тогтоолд Ерөнхийлөгч хориг тавьсан юм чинь түдгэлзүүлнэ гээд тогтоолоо гаргачихья л даа” гэсэн чинь Д.Эрдэнэбат гишүүн “Түдгэлзүүлэхгүй гэсэн тогтоолд нь хориг тавьсан болохоос түдгэлзүүл гээгүй юм аа” гэж толгой эргүүлэв. Тэгснээ түдгэлзүүлэх тогтоол гаргах ёстой юм болов уу, түдгэлзүүлэхийн тулд асуудлыг бүр эхнээс нь ярих ёстой юм болов уу? гэж бас баахан толгой нь эргэв. Эцэс сүүлд нь “Ерөөсөө наад хуулийн зохицуулалт чинь тодорхойгүй байна аа. Тодруулж байж асуудлаа хэлэлцье” гээд хойшлуулчихав. Тэгээд лхагва гаригт хойшлуулсан асуудлаа пүрэв гаригт (өчигдөр) дахиж хэлэлцээд АН-ын бүлэг тав хоногийн завсарлага авчихлаа.
Гэтэл өнөөдөр УИХ-ын чуулганыг хаах товтой болохоор ирэх намрын чуулган хүртэл Д.Мурат гишүүн мултрахгүй нь бололтой. Түдгэлзүүлэхгүй гэхээр Ерөнхийлөгч хориг тавиад, түдгэлзүүлчих гэхээр дээрээс юм дараад байгаа бололтой. Мултардаггүй Мурат аа гэж...
Б.ГАЛ