Засгийн газрын хуралдаан болж, хуралдаанаас гаргасан шийдвэрийг танилцуулж байна.
Шадар сайд С.Амарсайхан "Улсын хэмжээнд өнөөдөр нийтдээ 1,138,000 иргэн буюу нийт хүн амын 55 хувь нь вакцинд хамрагдаад байна. Цаашдаа вакцинжуулалтыг эрчимжүүлэх, вакцинд хамрагдсан иргэдийг урамшуулах, дэмжих үүднээс зарим асуудлыг хэлэлцэн шийдвэрлэлээ.
Мөн ХӨСҮТ-ийн засвар үйлчилгээ, шаардлагатай тоног төхөөрөмжийг сайжруулах үүнднээс 3,2 тэрбум төгрөгийн санхүүжилтыг шийдвэрлэлээ.
Тавдугаар сарын 8-ны дотор нийслэлийн иргэдийг дархлаажуулалтын эхний тунд хамруулах, Зургаадугаар сард багтан орон нутгийн иргэдийг хамруулахаар ажиллаж байна. Ингэснээр бид халдварын тархалтыг эрс бууруулаад зогсохгүй, өөрсдөө нийгэм, эдийн засгийн амьдралаа үргэлжлүүлэхэд томоохон түлхэц болно. Хэдийгээр иргэд вакцинжуулалтандаа идэвхтэй хамрагдаж байгаа ч өшөө илүү хамрагдах шаардлагатай байна.
Гадаад улс орнууд тэр болгон иргэдээ хүссэн хэмжээгээр вакцинжуулалтад хамруулж чадахгүй байгаа. Манай улсын хувьд харьцангүй төлөвлөгөөний дагуу вакцинжуулалтаа хийж байгаа тул иргэд идэвхтэй оролцох хэрэгтэй" гэлээ.
