Хөвсгөл аймгийн Онцгой байдлын газраас мэдээлж байна. 

Хөвсгөл аймгийн Тосонцэнгэл сумын Тээл багийн “Тэгш булан” гэдэг газар Сэлэнгэ мөрөнд долоон иргэн осолдсон харамсалтай хэрэг гарсан. Одоогийн байдлаар таван сартай хүүхэд болон 50, 63 настай эрэгтэйн цогцсыг олж уснаас гаргаж Цагдаагийн байгууллагад хүлээлгэн өгчээ.

Осолдсон иргэдийг эрэн хайх ажиллагаа үргэлжилж байна.

Тус аймгийн Онцгой байдлын газрын дарга хурандаа Ё.Пүрэвсүрэнгээр ахлуулсан баг Рашаант сумын Тээл багийн Цацын-Ам гэдэг газар хээрийн штабыг байгуулан ажиллаж байна. 

Осол болсон газар усны түвшин их, үерлэсэн, өргөн нь 133 метр, гүн нь 2-3.5 метртэй байна. Эрэн хайх ажиллагаанд Хөвсгөл, Орхон, Булган аймгийн Онцгой байдлын газрын Эрэн хайх аврах бүлгийн алба хаагчид, Цагдаагийн газрын алба хаагчид, Шүүх шинжилгээний албаны алба хаагчид, Тосонцэнгэл сумын Тамгын газар, Сумын Эрүүл мэндийн төв, Рашаант сумын Тамгын газар, орон нутгийн иргэд, Их-Уул сумын Тамгын газар, Эрүүл мэндийн төв, ар гэрийн хүмүүс нийт 156 хүн,  42 автомашин, 4 мотоцикл, 4 морь, 4 завьтайгаар эрлийн ажиллагааг үргэлжлүүлж байна.