Өнөөдрөөс Дархан-Уул аймагт сургууль, цэцэрлэгийг танхимаар хичээллүүлж эхэллээ.

Тус аймгийн хувьд Дархан-Уул аймгийн хэмжээнд нийт 27 сургуульд /ЕБС/ 22000 гаруй сурагч, 38 цэцэрлэгт 7000 орчим хүүхэд суралцдаг бөгөөд суралцагчид болон эцэг эхчүүдийн 97  хувь нь танхимын сургалтад хамрагдах хүсэлт гаргасан байна.

Ингэхдээ ЕБС-ийн нэг  ангийн сурагчдыг хоёр ээлжид хуваан нэг ээлж нь долоо хоногийн гурван өдөр хичээллэхээр хуваарийг баталжээ. Мөн нэг ширээнд нэг хүүхэд суулган, халдвар хамгааллын дэглэмийг мөрдүүлж байна.

Сургууль, цэцэрлэгийг танхимаар хичээллүүлж эхэлсэнтэй холбоотойгоор Дархан-Уул аймгийн Онцгой комиссоос дараах шийдвэрийг гаргажээ. Үүнд:

-Хот хоорондын замыг нээсэнтэй холбоотойгоор Улаанбаатар хотоос бусад аймаг, сумд руу халдвар тархах эрсдэл өндөр байгаа учир гуравдугаар сарын 11-ний өдрөөс эхлэн хүндэтгэн үзэх шалтгаанаас бусад тохиолдолд иргэдийн нийслэлээс ирэх болон явах хөдөлгөөнийг хязгаарлана.

-УОК-оос гаргасан шийдвэртэй холбоотойгоор энэ сарын 9, 10-ны өдрүүдэд нийслэлээс ирсэн иргэдийг буцах, Улаанбаатарт очсон Дарханы иргэдийг аймагтаа ирэх боломжоор хангаж хөдөлгөөнийг хэвээр байлгана.

Иймээс иргэдийг хоёр хоногийн хугацаанд /гуравдугаар сарын 9, 10/ хөдөлгөөнөө яаралтай хийхийг аймгийн Онцгой комиссоос анхаарууллаа.

УОК-ийн шийдвэрээр халдварын голомт, тархалт байхгүй "ногоон бүс"-д багтаж байгаа аймгууд өнөөдрөөс танхимын сургалтаа эхлүүлээд байна.