Эрүүл мэндийн яамны ээлжит мэдээллийн үеэр ХӨСҮТ-ийн Тандалт, судалгааны албаны дарга А.Амбасэлмаа сэтгүүлчдийн асуултад ариуллаа.
Түүний мэдээлснээр "Тэнүүн-Огоо" ХХК-ийн автобусны жолооч хийдэг хүнээс коронавирусийн халдвар илэрсэн. Энэ хүн хамгийн сүүлд ажилдаа арванхоёрдугаар сарын 24-нд очсон. Гэр бүлийнх нь хүн коронавирусийн халдвараар өвчилсөн учраас жолооч ойрын хавьтал нь байсан. БЗД-ийн нэгдсэн эмнэлгийн сахиур хүн халдвар авснаас "Тэнүүн-Огоо" ХХК-ийн жолооч халдварт өртсөн гэв.
"Тэнүүн-Огоо" ХХК 90 гаруй жолоочтой. Чингэлтэй, Зунжин гэсэн хойд чиглэлд явдаг автобусны жолооч халдвар авсан учраас дээрх чиглэлийн автобусны, ойрын хавьтлын 10 гаруй хүнийг тусгаарласан. Бусад хавьтлын 80 хүнээс шинжилгээ авсан. Арванхоёрдугаар сарын 20-24-ний өдрүүдэд тухайн автобусаар үйлчлүүлж байсан иргэд цэгүүдэд шинжилгээ өгөх шаардлагатай юм байна.
Мөн Чингэлтэй дүүргийн цагдаагийн хоёрдугаар хэлтсийн ажилтан халдварт өртсөн. Гэр бүлийнх нь хүн халдвартай байсан учир ойрын хавьтал гэж тусгаарлагдсан байсан. Арванхоёрдугаар сарын 21-нд хоёр дахь хавьтал гэж үзэн Чингэлтэй дүүргийн цагдаагийн хоёрдугаар хэлтсийн ажилтнуудыг шинжилгээнд хамруулсан. Тухайн үед ажилтнуудын шинжилгээнд коронавирус илрээгүй. Мөн өргөжүүлсэн байдлаар цагдаагийн хэлтсийн 254 хүнээс шинжилгээ авч байна гэв.
