Өчигдөр нийгмийн сүлжээг нилээдгүй донсолгосон мэдээлэл түгсэн. Тодруулбал, жүжигчин Б.Навчаа өөрийн цахим хуудаснаа Хууль зүй, Дотоод хэргийн сайд Х.Нямбаатарын гомдлоор шүүхэд дуудагдсан яллах дүгнэлтээ олон нийтэд харуулсан явдал байв.
Тэрээр өөрийн цахим хуудаснаа 2017 оны Эрүүгийн хуулийн өөрчлөлт, түүнд орсон насанд хүрээгүй хүүхдийн эсрэг хүчингийн гэмт хэргийн тухай заалтад сайд Х.Нямбаатарын буруутган бичсэн байсан юм.
Энэ асуудлаар өнөөдөр жүжигчин Б.Навчаа өөрийн цахим хуудаснаа дахин нэг ноцтой мэдээлэл хийлээ.
Тэрээр "За уучлаарай сэтгүүлчид минь би шүүх хурал болтол яриа өгч болохгүй. Учир нь Хууль зүйн сайд миний хууль эрх зүйг дордуулж нэмж ял өгөх учраас. Харин шүүх хурлын дараа болно шүү. Нямбаатар гэж бичих л юм бол хорино шүү гэж цагдаа намайг айлгасан" гэж бичжээ.
Харин 2017 оны Эрүүгийн хуульд өөрчлөлт оруулахад Ажлын хэсгийн ахлагчаар ажилласан сайд Х.Нямбаатар дараах тайлбарыг өгчээ.
Тэрээр "Сүүлийн өдрүүдэд 14-16 насны хүүхэдтэй бэлгийн харилцаанд оролцох гэмт хэргийг хуулиар зөвшөөрсөн этгээд гэж намайг гүтгэж байна. 16 насанд хүрээгүй хүнтэй бэлгийн харилцаанд тохиролцож орох гэмт хэрэг бол 1926 оноос хойших үе үеийн Эрүүгийн хуулиудад хуульчлагдаж ирсэн. Өмнөх хууль батлагдах үед би хууль тогтоогчоор ажиллаж байгаагүй. Үүнтэй холбоотой миний нэр төрийг гутаах ажлыг маш зохион байгуулалттайгаар хийж байна. Энэ ажлыг гардаж гүйцэтгэсэн хүний нэг бол жүжигчин Б.Навчаа. Би өөрөө охин хүүхэдтэй эцэг хүн. Эцгийг нь 14 настай хүүхэдтэй бэлгийн харилцаанд ордог хүчиндэгч гэж гүтгэх нь аав хүнд ямар байх вэ. Энэ утгаараа сонгуулийн үеэр ийм гүтгэлэг тараасан хүмүүсийг хуульчаараа дамжуулан цагдаагийн байгууллагад өгсөн. Хэрэг одоо хүртэл шийдэгдээгүй прокурорын шатанд яваа. Аливаа гүтгэлэг хэмжээ хязгаар байх ёстой. Огт оролцоогүй, санаачлаагүй хуулийнхаа төлөө гэр бүл, үр хүүхэд рүүгээ дайруулдаг гүтгэлэгт цэг тавих ёстой гэдэг үүднээс өргөдөл гаргасан" гэжээ.
