Засгийн газрын өнөөдрийн хуралдаанаар айл өрх, ААН-ийн цахилгаан, дулаан, хогны төлбөрийг энэ сарын 1-нээс 2021 оны долдугаар сар 1-н хүртэл төр хариуцах шийдвэр гаргалаа. Мөн сайжруулсан шахмал түлшийг 75 хувь хямдруулж борлуулхаар болов. 

Дээрх шийдвэрүүдийн санхүүжилтыг "Эрдэнэт үйлдвэр" ТӨҮГ, "Эрдэнэс Тавантолгой" ХК-ниуд хариуцхаар болсон байна.

Ерөнхий сайд У.Хүрэлсүх мэдээллийнхээ үеэр "Иргэд байгалийн баялагаа хүртэж байна гэж ойлгож болно" хэмээн тодотгосон юм. 

Тэрээр "Өнгөрсөн жил "Эрдэнэт үйлдвэр" ТӨҮГ улсдаа нэг их наяд төгрөгийн татвар төлсөн. Энэ жил ч мөн адил төлнө. Энэ шийдвэрүүд айл өрх, ААН-үүдэд томоохон дэмжлэг үзүүлэх байх гэж бодож байна. Нөгөө талаар бид суурь үнүүдийг чөлөөлж, төрөөс хариуцаж байна. Ингэснээр талх зэрэг өргөн хэрэглээний барааны үнэ нэмэгдэх учиргүй. Харин хямдрах ёстой. 

Энэ шийдвэрүүд долоон сарын хугацаатай хэрэгжинэ. Бизнес эрхлэгчид маань ажлын байраа цомхотгож болохгүй, цалин мөнгөө тавьж өгөх хэрэгтэй. Бараа бүтээгдхүүнийхээ үнийг нэмж болохгүй. Хаа хаанаа хохирол багатайгаар энэ долоон сарын ардаа орхих хэрэгтэй байна. 

Засгийн газраас вакцин орж ирээд цар тахлаас салтал 6-8 сарын хугацаа байна гэж тооцоолсон. Маргаашнаас ААН-үүд маань ажлаа эхэлнэ" гэлээ.