Дэлхийн стандартын өдрийг энэ жил “Эх дэлхийгээ стандартаар хамгаалах нь” уриан дор тэмдэглэж байна.
Байгаль орчны доройтол, бохирдлоос урьдчилан сэргийлэх, бууруулах зорилгоор байгаль орчны салбарын стандартчиллыг боловсронгуй болгох нь нэн чухал болжээ.
Стандартууд нь эрчим хүчний хэмнэлт, ус, агаарын чанарын бүхий л асуудлыг хамардаг учир стандартыг өргөнөөр ашиглах нь аж үйлдвэрийн үйлдвэрлэл, үйл явцын байгаль орчинд үзүүлэх нөлөөллийг бууруулж, хязгаарлагдмал нөөцийг дахин ашиглах, эрчим хүчний үр ашгийг дээшлүүлэхэд тусалж байдаг.
Байгаль орчинд хүний үзүүлж буй сөрөг нөлөөллийг зөв арга хэрэгсэлд тулгуурласан, улс төрийн зоригтой тодорхой шийдэл бууруулж чадна гэж дэлхий даяар үзэж байна.
Тэрхүү зөв арга хэрэгсэлийн нэг нь дэлхий даяар улс орнуудын баримтлан мөрдөж буй олон улсын стандарт юм. Зөвхөн ISO-ийн байгаль орчин, эрүүл мэндийн хамгаалал, аюулгүй байдал гэсэн ангилалд өнөөдрийн байдлаар 1900 орчим батлагдсан стандарт мөрдөгдөж байна.
Манай улсад байгаль орчны салбарт шууд хамаардаг үндэсний 396 стандарт мөрдөгддөг. 2012-2019 онд БОАЖЯ-аас санаачилан 71 стандартыг шинээр болон шинэчилэн боловсруулж батлуулжээ.
