ШӨХТГ-аас өнөөдөр өргөн хэрэглээний бараа, бүтээгдэхүүний үнэд хийсэн шалгалтын талаар мэдээллээ. Хяналт шалгалтын ажлыг МХЕГ, ГЕГ, ТЕГ, ШӨХТГ, НОБГ-ын хамтран СҮҮ ХК, "Талх чихэр" ХК, "Алтан тариа" ХХК, "Өгөөж чихэр боов" ХХК-уудад хийсэн байна.

Цар тахлаас урьдчилан сэргийлэх ажлын хүрээнд дараах хүнсний үйлдвэрлэгч компаниуд нь бараа бүтээгдэхүүнийхээ үнийг нэмсэн нь гамшгаас хамгаалах тухай хууль болон Засгийн газрын 78 дугаар тогтоолд заасан “Хуулийн этгээд нь гамшгийн үед бараа бүтээгдэхүүний үнийн хөөрөгдөл, зохиомол хомстол үүсгэхгүй байх, үнийг тогтвортой байлгах” гэсэн үүргийг биелүүлж ажлаагүй тул арга хэмжээ авчээ. 

Үүнд: 

• "Алтан тариа" ХХК 2020.07.31-ний өдрөөс гурилын үнээ ангилал төрлөөс хамаарч нэг кг тутмыг 50-100 төгрөгөөр;
• "Талх чихэр" ХК 2020.09.01-ний өдрөөс 20 төрлийн талхны үнийг талхны төрлөөс нь хамааран 100-500 төгрөгөөр;
• "Өгөөж чихэр боов" ХХК 2020.08.17-ний өдрөөс өөрийн үйлдвэрлэдэг 148 нэр төрлийн талх, нарийн боовны үнийг 50 төгрөгөөр;
• СҮҮ ХК 2020.09.01-ний өдрөөс Миний монгол сүүний үнийг 100 төгрөгөөр тус тус нэмсэн байна.

Мөн тус газрын мэдээлснээр эцсийн хэрэглэгчдийн гар дээр ирж буй мах үнэтэй байгаа нь ченжүүдээс үүдэлтэй гэв. 

ШӨХТГ-ын дарга Б.Бат-Эрдэнэ "Мах хэрэглэгчдийн гар дээр очихдоо 5-6 шат дамжлага дамждаг ба кг тутамд 2800-3000 төгрөгөөр нэмэгддэг. Нэг кг хонины мах 5000 төгрөгөөр нийлүүлэгдэж байгаа ч эцсийн хэрэглэгч дээр очихдоо 8000 төгрөг болж байна. Шат тутамдаа машинаас машин руу дамжихдаа ченжүүдийн гараар орж үнэ нь нэмэгдээд байна. Хэрэглэгчид хямд үнээр мах авах боломж байна. Үүнд төр ажиллана" гэв.