Чөлөөлөх дайны ялалтын түүхт 75 жилийн ой өнөөдөр тохиож байна. Энэ өдрийг тохиолдуулан Ерөнхийлөгч Х.Баттулга, Батлан хамгаалахын сайд Г.Сайханбаяр, Нийслэлийн Захирагчийн үүрэг гүйцэтгэгч Ж.Батбаясгалан тэргүүтэй холбогдох албаны хүмүүс чөлөөлөх дайнд оролцсон ахмад дайчдад хүндэтгэл үзүүлэв.
Мөн Ерөнхийлөгч Х.Баттулга зарлиг гаргаж, ахмад дайчдыг төрийн одон, медалиар шагнасан юм. Түүнчлэн Нийслэлийн Засаг даргын Тамгын газраас чөлөөлөх дайнд оролцсон ахмад дайчдад хүндэтгэл үзүүлж, мөнгөн тусламж олголоо. Мөнгөн тусламжийг Нийслэлийн Захирагчийн үүрэг гүйцэтгэгч Ж.Батбаясгалан ахмад дайчдад гардуулж өгөв.
Чөлөөлөх дайнд оролцсон Монгол Ардын Хувьсгалт цэргээс 94-103 насны 78 хүн өдгөө энх тунх амьдарч байна. Аугаа их Эх орны дайн, Дэлхийн хоёрдугаар дайн дууссаны болон Алс Дорнодын 1945 оны Чөлөөлөх дайны ялалтын 75 жилийн ой 2020 оны есдүгээр сарын 02-03-ны өдрүүдэд тохиож байгаа юм. Чөлөөлөх дайны ялалтын 75 жилийн ойн хүрээнд “Дэлхийн хоёрдугаар дайны төгсгөл: Манжуурын стратегийн давшилтын ажиллагаанд Монгол Улсын оролцоо” сэдэвт олон улсын эрдэм шинжилгээний хурал Улаанбаатар дахь Оросын шинжлэх ухаан, соёлын төвд өнөөдөр боллоо.
Мөн есдүгээр сарын 01-09-ний өдрүүдэд “Тусгаар тогтнолын үнэ цэн” үзэсгэлэнг Улаанбаатар дахь Оросын шинжлэх ухаан, соёлын төвд дэлгэж байна. Үзэсгэлэнд Чөлөөлөх дайнтай холбоотой архивын ховор баримтууд, эд өлгийн зүйлс, дайчдын хувцас хэрэглэл зэрэг үзмэрүүдийг тавьжээ.
