Волейболын спортын олон улсын хэмжээний мастер, Ардын боловсролын тэргүүний ажилтан Жаргалын Хаянхярваа 2020 оны 8 дугаар сарын 26-ний өдөр таалал төгсөж Волейболчид бидэнд нөхөж барашгүй гарз тохиолоо.

Жаргалын Хаянхярваа 1936 онд Төв аймгийн Баянзүрх сумын нутагт төрсөн. 1956 онд 10 жилийн II сургуулийг 1956-1960 онд МУИС-ийн Физизикийн ангид суралцаж төгссөн. 1953 оноос “Соёл” нийгэмлэгийн хөлбөмбөг, сагсан бөмбөгийн тамирчнаар спортын замналаа эхлүүлж, 1956 оноос Монгол Улсын волейболын шигшээ багт тамирчнаар орж, 1972 он хүртэл тоглогч, багийн ахлагч, дасаглжуулачгийн албыг хавсран гүйцэтгэж байсан. Үүнээс 1956-1970 онд 15 жилийн турш тасралтгүй улсын шигшээ багт тоглож, 1970-1972 онд “Хоршоолол” нийгэмлэгт дасгалжуулагчаар ажиллаж байсан, 1972 оноос гадаад хэлний сургалттай 18-р сургуульд математик, биеийн тамир, хөдөлмөрийн багшаар ажиллаж байгаад 2006 онд гавьяаныхаа амралтад гарсан.

Улсад 49 жил ажилласнаас 34 жил нь боловсролын байгууллагад ажиллаж, Ардын боловсролын тэргүүний ажилтан цол шагнуулж, тэргүүлэх багш цолтойгоор гавьяаныхаа амралтад гарах хүртлээ ажил үүргээ нэр төртэй биелүүлж явсан.

Ж.Хаянхярваа их спортод 40 гаруй жилийн амьдралаа зориулж, Дэлхийн аварга шалгаруулах тэмцээнд 3 удаа, Универсиад наадам, Дэлхийн оюутан залуучуудын фестивальд оролцож явсан. Волейболын Олон улсын хэмжээний мастер цолтой.

Ж.Хаянхярваа нь мини волейболын улсын аварга шалгаруулах тэмцээнийг 20 гаруй жил тасралтгүй өөрийн нэрэмжит болгон зохион байгуулж, Монгол улсад волейболын спортыг хөгжүүлэх, энэ спортын үр үндсийг тавих ажилд бие сэтгэлээ зориулж байсан юм.

Ж.Хаянхаярваагийн хөдөлмөр бүтээлийг төр засаг, өндөр үнэлж 1986 онд Биеийн тамир, спортын тэргүүний ажилтан, 1991 онд Ардын боловсролын тэргүүний ажилтан, 1993 онд БХТН-ийн тэргүүний ажилтан, 2013 онд Хөдөлмөрийн гавьяаны улаан тугийн одонгоор шагнагдсан.

Ж.Хаянхярваа нь үр хүүхдийнхээ өмөг түшиг нь болсон аав, дүү нарынхаа багана болсон ах, найз нөхдийнхөө бахархал болсон анд, шавь нарынхаа аав нь болсон багш, Монголын волейболын манлайлагч, сурган хүмүүжүүлэгч байлаа.

Ж.Хаянхярваа Монголын волейболын спортыг хүүхэд багачуудын дунд хөгжүүлэхийн тулд ажил хөдөлмөрөө зориулж ирсэн дардан зам нь тасрахгүй мөнхөд гэрэлтэх болно. Таны минь хүнлэг сайхан сэтгэл, шудрага хичээнгүй зан, өөдрөг хүсэл тэмүүлэл тань бид бүхний зүрх сэтгэлд мөнхөд хоногшин үлдэх болно.

ТҮҮНИЙ ГЭР БҮЛ, ҮР ХҮҮХЭД, ТӨРӨЛ ТӨРӨГСӨД, ШАВЬ НАРТ НЬ ГҮН ЭМГЭНЭЛ ИЛЭРХИЙЛЬЕ.

Ум сайн амгалан болтугай.

МОНГОЛЫН ВОЛЕЙБОЛЫН ХОЛБОО

МОНГОЛЫН ВОЛЕЙБОЛЫН ХОЛБООНЫ УДИРДАХ ЗӨВЛӨЛ