Улсын Онцгой комиссын хуралдаан өнөөдөр болж өндөржүүлсэн бэлэн байдлын зэргийн хугацааг Долоодугаар сарын 15-н хүртэл сунгалаа.
Өнөөдрийн хуралдаанаар дотооддоо хязгаарлалтад буй үйлчилгээний байгууллагуудаа халдваргүйтэл, ариутгалын дор шат дараатайгаар нээхээр болжээ.
Засгийн газрын Хэвлэл мэдээлэлтэй харилцах хэлтсийн дарга Ц.Ганзориг: "УОК-ын 25-р хуралдаанаар Гамшгаас хамгаалах өндөржүүлсэн бэлэн байдлын хэсэгчилсэн зэргийг долоодугаар сарын 15-ны хүртэл сунгах шийдвэрийг гаргажээ. Хил нээхгүй бөгөөд хил нээсэн ч хөрш орнууд хил нээгээгүйгээс гадна олон улсын эрсдлийн зэргийн үнэлгээг харгалзан хил нээх боломжгүй гэсэн шийдвэр гаргалаа" гэв.
Мөн нийтийг хамарсан зарим үйлчилгээнүүдийг 2020 оны Долоодугаар сарын 01-ний өдрөөс үе шаттай нээх чиглэлээр эрх хэмжээний хүрээнд шийдвэр гаргаж ажиллахыг аймаг, дүүргийн засаг дарга нарт зөвшөөрлөө. Иймд хүүхдэд компьютер тоглоомоос бусад тоглоомын үйлчилгээ үзүүлдэг хүүхдийн тоглоомын газар, сургалт, амралтын зуслан, кино театр, үзвэр үйлчилгээ эрхэлдэг байгууллагууд, театр, чуулга, ресторан, уушийн газар, караоке, шашин номын газруудыг халдвар хамгааллын шаардлагыг хангасан тохиолдолд үйл ажиллагаагаа нээх боломжтой болов. Ингэснээр зөвхөн нийслэлд 960 аж ахуйн нэгжийн 10 мянга гаруй ажлын байр идэвхжих юм.
Түүнчлэн хөрш хоёр орноос 700-аад иргэнээ Замын-Үүд, Алтанбулаг боомтуудаар татан авахаар шийдвэрлэсэн бол Долоодугаар сард нийт 10-12 захиалгат нислэг үйлдэх саналтай байгаагаа Гадаад харилцааны яамны Консулын газраас танилцуулж зарим зөвшөөрлөө авчээ.