Элэг шилжүүлэн суулгах мэс засал амжилттай хийлгэсэн таван настай Ц.Энхномин охины өнөөдөр эмнэлгээс гарлаа.

Тэрбээр ээжээсээ эрүүл саруул төрсөн хэдий ч нярайн шарлалт нь арилалгүй элгэндээ нөлөөлж элэгний хатуурал буюу циррозтой болсон байна. Дөнгөж төрөөд хоёрхон сартай байхдаа цөсний хүүдийн хагалгаанд орсон ч шарлалт нь нэгэнт элгэндээ нөлөөлсөн байж. 

Ингээд сайн санаат ард түмнийхээ тусламж, хандиваар охин тавдугаар сарын 4-ний өдөр Улсын Нэгдүгээр эмнэлэгт элэг шилжүүлэн суулгах мэс засалд оржээ. Ийнхүү өнөөдөр охины бие тэнхэрч эмнэлгээс гарлаа. 

"БАГА НАСНЫ ХҮҮХДЭД ЭЛЭГ ШИЛЖҮҮЛЭН СУУЛГАСАН ДӨРӨВ ДЭХ АМЖИЛТТАЙ ТОХИОЛДОЛ"

Анагаахын Шинжлэх Ухааны доктор, профессор, Элэг шилжүүлэн суулгах багийн ахлагч О.Сэргэлэн "Энхномин охин элэгний төрөлхийн цөсний замын битүүрэлтэй, элэг нь бүрэн ажиллагаагүй болсон, их хүнд байдалтай хагалгаанд орсон.

Мэс засал 14 цаг үргэлжилсэн. Өнөөдөр 20 дохь хоног дээрээ эмнэлгээс гарч байна. Биеийн байдал нь бүрэн тогтворжсон. Гэхдээ цаашид байнгын хяналтад байж, эмчилгээнд явах шаардлагатай. 

Эрхтэн шилжүүлэн суулгах мэс заслын 20 хувь нь л мэс заслаасаа шалтгаалдаг, үлдсэн 80 хувь нь хагалгааны дараах асаргаа, сувилгаа, гам барилт, хүнээс нь өөрөөс нь шалтгаалдаг. Учир нь эрхтэн шилжүүлэн суулгасны дараа дархлааг нь маш их дарангуйлдаг, тиймээс маш их асаргаа сувилгаа хэрэгтэй, байнга эм ууж байх ёстой. 

Тиймээс хэрвээ эхний 1-3 жилийг маш сайн хяналтад өнгөрүүлбэл, охин цаашид хэд ч наслах боломжтой. 

Охины мэс засалд нийт 20 эмч баг болж орсон бөгөөд Солонгоос 7 эмч ирж хамт ажилласан. Ер нь охины төлөө эмнэлэг даяараа 60 гаруй хүн ажилласан. 

Охины мэс засал бол бидний 48 дахь удаагийнх болж байна. Монгол Улсад 2011 онд анх элэг шилжүүлэн суулгах хагалгааг хийж эхэлжээ" гэв. О.Сэргэлэн эмчийн хэлж буйгаар Улсын Нэгдүгээр эмнэлэгт элэг шилжүүлэн суулгах мэс заслыг дөрөв дэхь удаагаа бага насны хүүхдэд хийсэн нь энэ аж. 

"48 ЦАГИЙН ДОТОР 67 САЯ ТӨГРӨГ ЦУГЛАСАН"

Хандив зохион байгуулагч Ж.Отгонбаяр "Анх охины талаар олон нийтийн сүлжээнээс мэдсэн, харахад л элэг эмтрэм зураг байсан. Тиймээс эхлээд охины талаар судалж, эмч нартай уулзсан юм. Тэгэхэд 99 хувь эдгэх боломжтой мөртлөө мөнгөний боломжгүйгээс болж хагалгаанд орж чадахгүй нөхцөл байдалтай болсон байсан. 

Ингээд охинд туслахыг хүсч, өөрийн сошиал хуудсыг ашигласан. 5,000 фэйсбүүк найзаасаа дор хаяж тус бүрээс нь 5,000 төгрөг цуглуулчих юм бол 25 сая төгрөг болох нь. Ядаж л 20 саяыг нь олоод өгч чадах юм байна гэсэн бодол төрсөн. Тэгээд пост хийхэд 48 хан цагийн дотор 67 сая төгрөг цугласан. 5 мянгаас 5 сая төгрөг хүртэлх мөнгийг хүмүүс хандивлаж байсан. Ингээд тэр мөнгөөр охины бүх эмчилгээний зардлыг хийж өгсөн. 

Охин ээж, хоёр ахтайгаа амьдардаг. Ээж нь цэвэрлэгч, хоёр ах нь 11, 14 настай. Мөн тогтсон орон гэр байхгүй. Тиймээс эмнэлэгт байх хугацаанд нь бид охины гэр бүлд нэг өрөө байр авч өгч, тавилгажуулсан байгаа. Хагалгааны дараа эрүүл ахуй маш чухал учир охин аюулгүй орчинд амьдрах ёстой. Мөн цаашид 3 сарын хугацаанд гарах эмчилгээний зардал зэргийг бүгдийг нь бид даана. 

Мөн донор болсон охины аавын асуудлыг бид давхар хариуцаж, эмчилгээний зардал, нийгмийн асуудлуудыг шийдэж өгсөн. 

Үүнээс үүдээд хэлэхэд, яг энэ төрлийн өвчтэй, асуудалтай маш олон хүүхэд байдаг. Тиймээс төр засаг энэ бүлгийн иргэд рүү анхаарал хандуулаасай гэж хүсэж байна.

Мөн энэ дашрамд, охины төлөө чин сэтгэлийн халуун гараа сунгасан бүх элэг нэгт Монголчууддаа баярласан, талархсанаа илэрхийлж байна" гэлээ.

"ОХИНЫГ МИНЬ ЭДГЭЭЖ ӨГСӨНД МАШ ИХ БАЯРЛАЛАА"

Охины ээж Г.Цэрэнбүжид "Сэтгэл санаа маш сайхан байна. Охин минь эрүүл саруул боллоо. Охиныг минь эдгээж өгсөн эмч, сувилагч, тусламж үзүүлсэн Ж.Отгонбаяр, бүх ард түмэндээ маш их баярлаж, талархсанаа илэрхийлье" гэв.

Эх сурвалж: IKON.MN