УОК-ын өнөөдрийн хурадаанаар өндөржүүлсэн бэлэн байдлын хугацаа болон бүх шатны боловсролын байгууллагын үйл ажиллагааг зогсоох шийдвэрийг сунган дөрөвдүгээр сарын 30-н хүртэл үргэлжлүүлэх шийдвэр гаргасан. 

Энэ үеэр шадар сайд Ө.Энхтүвшин "Гадаад улсад байгаа иргэдээ, өмнө тусгай нислэг үйлдэж эх орондоо ирсэн иргэдийн тусгаарлалтын хугацаа дуусхаар дараагийн нислэгээ /14 хоногийн дараа/ хийхээр төлөвлөж, бэлтгэл хангаж байгаа" гэсэн юм. 

Харин энэ ням гаригт Улаанбаатар-Дархан чиглэлийн замын бүтээн байгуулалтад ажиллах БНХАУ-ын 105 иргэнийг чартер нислэгээр авчирхаар болжээ. 

Энэ талаар Зам, тээврийн хөгжлийн сайд Б.Энх-Амгалан “Улаанбаатар-Дархан чиглэлийн замын асуудлыг Засгийн газарт танилцуулсан. Энэ жил гаднаас 6000 гаруй хүн ажиллахаар ирэхээр байгаа бөгөөд онцгой шаардлагагүй гэж үзсэн. Харин онцгой шаардлагатай, хугацаатай, гэрээтэй ажлууд дээр гаднаас ажиллах хүч авахаар болж байна. Ялангуяа Улаанбаатар-Дархан чиглэлийн авто замын бүтээн байгуулалтын ажилд бүтэн сайн өдөр чартераар татаж авна. БНХАУ-д байхдаа шинэ коронавирусийн шинжилгээгээ өгч, визээ авна. Монголд ирээд хөдөлмөрлөх эрхээ авна. Онгоцноос буумагц тусгай машинаар хамгаалалтад авч Төв аймагт тусгаарлана. 14 хоногийн хугацаанд бүх бичиг баримтыг нь бүрдүүлж, шинжилгээний хариуг маш сайн харж байж ажилд нь оруулна гэж тооцож байна” гэв. 

Улаанбаатар-Дархан чиглэлийн замын туслан гүйцэтгэгч компаниуд ажилдаа орсон бөгөөд эдгээр БНХАУ-ын иргэдийг онгоцноос буумагц, Төв аймагт тусгаарлан 14 хоногийн дараа шинжилгээний хариуг үндэслэн ажилд гаргах юм байна.