Герман улсын Олденбург, Делменхорст хотуудын эмнэлэгт ажиллаж байхдаа 85 өвчтөний аминд хүрсэн сувилагчид шүүхээс бүх насаар нь хорих ял оноожээ.

Ольденбург хотын шүүхээс түүнийг 85 хүний амийг хөнөөсөн гэж буруутгасан боловч шүүгдэгч Нильс Хёгел 43-ыг нь хүлээн зөвшөөрсөн байна. Харин цагдаа нар амийг нь хөнөөсөн хохирогчдын тоо 200-д хүрнэ гэж үзэж байгаа аж.

Сувилагч Нильс Хёгел гэх этгээд нь өдгөө 42 настай бөгөөд 1999 - 2005 онуудад өвчтөнд зориудаар зүрх судасны асуудал үүсгэх тариа хийж хүндрүүлээд дараа нь сэхээн амьдруулж нэр хүндээ өсгөдөг байсан байна. Гэхдээ энэ эрсдэлтэй үйлдэл нь тэр бүр амжилттай болдоггүй байснаас зарим өвчтөн амиа алддаг байжээ.

Түүний энэ аймшигт үйлдлийг 2005 онд хамт ажилладаг байсан сувилагч анзааран анх хуулийн байгууллагад мэдээлж байжээ. Тэр үед Германы шүүх түүнд хүний амь хөнөөхийг завдсан хэрэг тулгаж, долоон жил шоронд хорих ялаар шийтгэж байсан байна. Гэвч өнгөрсөн хугацаанд түүний амийг нь хөнөөсөн хүмүүсийн тоо нэмэгдсээр 85 хүрсэн байна.

Хёгелийг Германы орчин үеийн түүхэн дэх хамгийн аймшигт цуврал алуурчин гэж нэрлэжээ. Шүүх хурлын сүүлийн өдөр тэрээр хохирогчдын ар гэрийнхээс аймшигт үйлдэл гаргасандаа уучлалт гуйсан байна.