Хиймэл оюун (AI) өнөөдөр зөвхөн технологийн салбарын гол сэдэв байхаа больж, бидний өдөр тутмын амьдралын нэг хэсэг болоод байна. Харин кино урлаг энэхүү өөрчлөлтийг бодит амьдралаас хэдэн арван жилийн өмнөөс төсөөлөн, ирээдүйн олон хувилбарыг үзэгчдэд хүргэсээр иржээ.

Зарим бүтээлд хиймэл оюуныг хүн төрөлхтөнд заналхийлэх аюул болгон дүрсэлдэг бол нөгөөд нь хүний үнэнч туслагч, хамтрагч, бүр сэтгэл хөдлөл ойлгодог "оршихуй" болгон харуулдаг. AP агентлаг хиймэл оюуны талаар өгүүлдэг хамгийн онцлох кино, телевизийн бүтээлүүдийг онцолсон байна.

Тухайлбал, Жеймс Камероны "The Terminator" кинонд өөрийгөө ухамсарласан Skynet систем хүн төрөлхтний эсрэг дайн эхлүүлдэг бол Стэнли Кубрикийн "2001: A Space Odyssey" киноны HAL 9000 компьютер хүний амь насыг үл хайхран шийдвэр гаргаж, хиймэл оюуны эрсдэлийг харуулсан сонгодог дүрүүдийн нэг болжээ.

Харин "Blade Runner", "Ex Machina" кинонууд хиймэл оюун ухамсар, эрх чөлөөтэй болж чадах эсэх, хүн ба машины ялгаа хаана орших вэ гэсэн философийн асуултыг хөнддөг. "Her" кинонд хүн хиймэл оюуны үйлдлийн системтэй сэтгэл хөдлөлийн холбоо тогтоож буйг өгүүлдэг бол "WALL-E" кино технологид хэт найдсан нийгэм, хүрээлэн буй орчны асуудлыг уянгын өнгө аясаар харуулжээ.

Мөн "WarGames" кино автоматжуулсан цэргийн системийн эрсдэлийг сануулдаг бол "Interstellar" киноны TARS, CASE роботууд хиймэл оюуныг хүний итгэлт хамтрагч, туслах байдлаар дүрсэлсэн байдаг. Харин "The Mitchells vs. the Machines" хүүхэд, гэр бүлийн үзэгчдэд зориулсан хөгжилтэй хэлбэрээр технологийн хэт хамаарлын талаар өгүүлдэг.

Хиймэл оюуны хөгжил хурдацтай өрнөж буй өнөө үед эдгээр кино, цувралуудыг дахин үзэхэд зөвхөн уран зөгнөл бус, бодит байдалтай улам ойртож буй олон асуултыг эргэцүүлэх боломж олгож байна. Зарим нь ирээдүйн эрсдэлийг сануулж, зарим нь хүн ба технологи хэрхэн хамтран оршиж болохыг харуулдаг нь өнөөдөр ч үнэ цэнээ алдаагүй хэвээр байгаа юм.