Хятад улсын шүүхээс даваа гаригт Канадын иргэн Роберт Ллойд Шелленбэргийг хар тамхи хилээр нэвтрүүлсэн хэрэгт буруутгаж, цаазын ял оноожээ. Энэхүү шийдвэр нь хоёр улсын дипломат маргааныг улам гүнзгийрүүлж болзошгүй байна гэж хэвлэлүүд мэдээлж байна.

Даваа гаригт гаргасан Хятадын шүүхийн энэ шийдвэрийг хэвлэлүүд Канад Хятадын "Хуавей" компанийн орлогч захирал Мэн Ванжоуг АНУ-ын талын хүсэлтээр барьж хорьсон явдалтай холбон бичиж байна.

Тодруулбал, Хятадын талаас "Хуавей" компанийн орлогч захиралыг баривчилсны дараа Канадын хоёр ч иргэнийг барьж хорьж, хоёр улсын харилцаа сайнгүй байгаа. Сүүлд Хятадын талаас гэнэт Шелленбэргийн хэргийг эрчимтэй урагшлуулж, гадаадын сэтгүүлч нарыг шүүх хуралд байлцуулсан нь маш ховор үйлдэл болжээ. 

Өнгөрсөн онд шүүх Шелленбэргт 15 жилийн хорих ял өгсөн ч, давж заалдах хурлын дараа “Энэ ял хэтэрхий зөөлөн шийтгэл байна” гэж шүүхээс мэдэгджээ.

Шелленбергийн хувьд өнгөрсөн оны арваннэгдүгээр сард тэр Хятадын хилээр 200 кг орчим метамфетамин хэмээх бодис нэвтрүүлэхийг завдсан хэрэгт буруутгагдан 15 жил шоронд хоригдох, 150,000 юаний ($22,000) торгууль төлөх ял шийтгэл сонсжээ.

Шелленбэрг хэргийг мэдүүлэхдээ "Түүний хөлсөлсөн орчуулагч Шу Чинийг бүх хэрэгт буруутай, би улс дамжсан хар тамхины гэмт хэргийн ажиллагааны золиос болсон" гэжээ. Тэр Хятадад ирэхээсээ өмнө Лаос, Мьянмар, Малайз, Сингапур, Тайланд зэрэг орнуудаар аялж байжээ.

Харин түүний орчуулагч Шу Чинь "Шелленбэрг машины дугуйнд мансууруулах бодис нуун хилээр нэвтрүүлэх даалгавар өгч байсан" гэж мэдүүлсэн байна. 

Шүүхийн шийдвэрийг гарсны дараа Канадын ерөнхий сайд Жастин Трюдо иргэнд нь цаазын ял оноосон явдалд санаа зовж байгаагаа илэрхийлээд Шелленбэргийг суллуулахын тулд бүх арга хэмжээг авна гэж амлажээ.

Мөн Канадын ерөнхий сайд Жастин Трюдо хэргийг дур зоргоороо шийдэж байгаа Бээжингийн эрх баригчдын үйлдлийг шүүмжилж, дэлхийн бүх улс орнууд уг хэрэгт санаа зовж, анхааралдаа авах ёстой гэж хэлсэн нь түүний Хятадын эсрэг хийсэн хамгийн хатуу мэдэгдэл байлаа.

Шүүхээс Шелленбэргт цаазын ял дуулгахаас өмнөхөн тэрээр хэвлэлд “Би хар тамхины наймаачин биш. Хятадад жуулчлалаар ирсэн” гэж ярьсан байна. Канадын иргэн Шеленбергт давж заалдах 10 хоногийн хугацаа байгаа юм байна. 

Харин Хятад улс өмнө нь хар тамхины хэрэгт буруутгагдсан Япон, Филиппиний иргэнийг цаазалж байжээ.