БНХАУ-ын Шаньси мужийн Шиань хотын Баруун хойд техникийн их сургуулийн (NPU) судалгааны баг дэлхийд анх удаа сансрын тойрог замд утасгүй, суулгац хэлбэрийн тархи-компьютерын интерфэйс төхөөрөмжийг туршжээ.

Чан Хунлон, Жи Бовэнь нарын удирдсан эрдэмтдийн баг өнгөрсөн оны 12 дугаар сард уг төхөөрөмжийг туршилтын платформоор тойрог замд илгээсэн байна. Сансрын нөхцөлд ажилласан уг систем нь хүний биеийн шингэнтэй ижил орчинд тархины цахилгаан бичлэгийн дохиог тасралтгүй бүртгэж, тоног төхөөрөмжийн ажиллах хүчин чадал, гадны нөлөөллийг тэсвэрлэж чадах эсэх талаарх чухал мэдээллийг цуглуулжээ.

Туршилтын үр дүн нь сансрын бичил татах хүч тархины үйл ажиллагаанд хэрхэн нөлөөлдгийг судлах шинэ боломжийг нээж байна. Энэ нь урт хугацааны сансрын нислэг үйлдэж буй сансрын нисгэгчдийн тархины эрүүл мэндийг хамгаалахад чухал юм.

Судалгааны баг тархины зөөлөн эдэд зохицон хэлбэрээ өөрчилдөг уян хатан электродын багцыг зохион бүтээсэн нь тархины гадаргууг гэмтээлгүйгээр өндөр чанартай дохио хүлээн авах боломжийг олгосон байна.

Туршилтаар шинэ төхөөрөмжийн бат бөх байдал нь ердийн металл электродуудаас хэдэн зуу дахин илүү байгааг баталжээ. Мөн уг систем нь соронзон резонансын дүрс оношилгооны (MRI) төхөөрөмжийн хүчтэй орчинд ажиллах хүчин чадалтай юм байна.

БНХАУ-ын Засгийн газар тархи-компьютерын интерфэйс технологийг тэргүүлэх чиглэлийн үйлдвэрлэлийн жагсаалтад оруулж, бодлогоор дэмжиж байна. Өнгөрсөн оны 8 дугаар сард тус улсын Аж үйлдвэр, мэдээллийн технологийн яамнаас гаргасан удирдамжийн дагуу ирэх он гэхэд уг технологийг үйлдвэрлэл, эрүүл мэнд, өргөн хэрэглээний зах зээлд нэвтрүүлж, 2030 он гэхэд аюулгүй, найдвартай аж үйлдвэрийн экосистемийг бүрдүүлэхээр зорьж байна.

Эх сурвалж: Kazinform