SpaceX компанийн үүсгэн байгуулагч Илон Маск ойрын ирээдүйн гол зорилгоо өөрчилж, Сарны гадаргуу дээр бие даан орших чадвартай хот байгуулахыг эн тэргүүний зорилтоо болгон зарлалаа. Түүний үзэж буйгаар, Сарны анхны хот ирэх 10 жилийн дотор сүндэрлэх боломжтой бол Ангараг гараг дээр ийм хэмжээний хот байгуулахад дор хаяж 20 жил шаардлагатай гэнэ.

Сар руу чиглэх болсон шалтгаан: Ойрхон бөгөөд ашигтай

Илон Маск өөрийн "X" (хуучнаар Twitter) хуудсаараа дамжуулан энэхүү шийдвэрийнхээ үндэслэлийг тайлбарлахдаа логистикийн давуу талыг онцолжээ.

• Нислэгийн давтамж: Ангараг гараг руу нисэх "цонх" буюу тохиромжтой хугацаа 26 сард нэг удаа тохиодог бол Сар руу 10 хоног тутамд пуужин хөөргөх боломжтой.

• Хугацаа: Ангараг руу хүрэхэд хагас жил (6 сар) зарцуулдаг бол Сар руу ердөө 2 хоногийн дотор очих боломжтой юм.

Ангараг гараг "түр хүлээлгийн" жагсаалтад

Маск Улаан нүдэн гарагийг эзэмших мөрөөдлөөсөө бүрмөсөн татгалзаагүй гэдгээ мэдэгдэв. Тэрээр Сарны төслийг жигдрүүлсний дараа буюу ойролцоогоор 5-7 жилийн дараа Ангараг гарагийн төсөл рүүгээ эргэн орохоор төлөвлөж байна.

Сануулахад, нэгдүгээр сарын 17-ны шөнө Сарны нислэгт зориулан бүтээсэн дэлхийн хамгийн том "Starship" пуужингийн ээлжит туршилт болсон ч түлш алдагдсаны улмаас дэлбэрч, амжилтгүй болсон билээ. Гэсэн хэдий ч энэхүү техникийн саатал SpaceX-ийн алсын харааг зогсоосонгүй.

Сарны «зочид буудал» ба сансрын аялал жуулчлал

Зөвхөн SpaceX ч биш, бусад стартапууд ч Сар руу хараагаа чиглүүлж эхэлжээ. Сан-Францискод төвтэй "GRU Space" стартап Сарны гадаргуу дээр томоохон хэмжээний буудал барих төлөвлөгөөгөө танилцууллаа. Тэдний тооцоолсноор, Саран дээр очиж амраад буцаж ирэх нийт зардал нь ойролцоогоор 10 сая ам.доллар болох бөгөөд энэ нь сансрын аялал жуулчлалын салбарт шинэ үүд хаалга нээх юм.

Эх сурвалж: Office Life