АНУ-ын Ерөнхийлөгч Дональд Трамп өнөөдрөөс буюу лхагва гарагаас Энэтхэгээс нийлүүлж буй бараанд 50 хувийн татвар ногдуулах шийдвэрийг хэрэгжүүллээ. Энэ нь худалдааны түншүүддээ тавьсан хамгийн өндөр татвар бөгөөд Трампын хэлснээр, Энэтхэг Оросын нефтийг худалдан авахаа зогсоохгүй байгаа тул хоёрдогч хориг тавихаас аргагүйд хүрсэн гэжээ.

Вашингтоны үзэж байгаагаар, Орос нефть зарсан орлогоороо Украинд явуулж буй дайныг санхүүжүүлж байгаа тул түүнийг худалдан авч буй улсуудын эсрэг хатуу арга хэмжээ авах шаардлагатай болсон байна. Энэтхэг нь Хятадын дараа орж, Оросын нефтийн томоохон худалдан авагч болжээ.

Гэвч 50 хувийн татвар Энэтхэгээс АНУ-д нийлүүлж буй бүх бараанд үйлчлэхгүй. Жишээлбэл, эм, компьютерийн чип зэрэг тодорхой бүтээгдэхүүнүүдэд тусад нь татвар тооцох аж. Үүнээс өмнө сүүлийн гурван долоо хоногийн хугацаанд Энэтхэгийн бараанд 25 хувийн торгуулийн татвар үйлчилж байсан юм.

Мэдээлснээр, Украинд дайн эхэлснээс хойш Энэтхэгийн Оросоос авдаг нефтийн хэмжээ 2 хувиас 36 хувь хүртэл өсжээ. Зарим шинжээчдийн үзэж байгаагаар Барууны зарим улс орнууд Оросын нефтийг Энэтхэгээр дамжуулан худалдан авч, хориг арга хэмжээг тойрч байгаа гэжээ.

Энэтхэгийн Ерөнхий сайд Нарендра Моди улс орныхоо эрчим хүчний бие даасан байдлыг хангахыг эрмэлзэж байгаагаа мэдэгдсэн байна.

Эх сурвалж: DW