Украины Ерөнхийлөгч Владимир Зеленский ОХУ-ын Ерөнхийлөгч Владимир Путинтэй яаралтай дээд хэмжээний уулзалт хийхийн төлөө ажиллаж буйгаа мэдэгдэв. Тэрбээр энэ долоо хоногт Турк, Булангийн орнууд болон Европын зарим улстай холбоо тогтоон, яриа хэлэлцээний талбар гаргахыг зорьж байгаагаа дүрс бичлэгээр дамжуулан мэдэгдсэн байна. Түүний хэлснээр, Украин талаас дайныг зогсоохын тулд бүх зүйлийг бэлэн байлгах болно гэжээ.
Мөн тэрбээр цаашид АНУ-ын шахалт чухал нөлөө үзүүлэх бөгөөд хориг арга хэмжээ, тарифыг нэмэгдүүлэх замаар Орост дарамт үзүүлэх ёстойг онцлов. Зеленский даваа гарагт Киев хотноо Украины асуудал эрхэлсэн АНУ-ын тусгай төлөөлөгч Кит Келлогтой уулзаж, “оросуудад хэрхэн нөлөөлөх” талаар ярилцсан тухайгаа дурдсан юм.
Украины Гадаад хэргийн сайд Андрей Сибига ч мөн адил мэдэгдэл хийж, Украин ямар ч улс оронд, ямар ч хэлбэрээр уулзалт хийхэд бэлэн гэдгээ мэдэгдэв. Харин ОХУ-ын Гадаад хэргийн сайд Сергей Лавров Украины хүчин чармайлтыг буруутгаж, яриа хэлэлцээг саадтай болгож байна хэмээн мэдэгджээ.
АНУ-ын Ерөнхийлөгч Дональд Трамп энэ сарын эхээр Аляскт В.Путинтэй уулзаж, хоёр орны дээд хэмжээний уулзалтыг зохион байгуулах санал гаргасан нь нөхцөл байдлыг улам анхаарал татахуйц болгож байна.
Эх сурвалж: NHK
