Хятад улсын хойд нутгийн томоохон боомт хот Тянжинд энэ сарын 31-нээс ирэх сарын 1-ний өдрүүдэд Шанхайн хамтын ажиллагааны байгууллагын дээд хэмжээний уулзалт болох гэж байна. Энэхүү уулзалт нь ШХАБ-ын түүхэнд хамгийн өргөн цар хүрээтэйгээр тооцогдож, 20 гаруй улсын төрийн тэргүүн, олон улсын 10 байгууллагын удирдагчид оролцох ажээ.

Хотын бэлтгэл ажил ид өрнөж, өнгө төрхийг шинэчлэх зорилгоор Хайхэ голын дагуух 217 барилга байгууламж, 14 гүүр болон 8,2 км талбайг гэрэлтүүлж, шөнийн үзэмжийг бүрдүүлсэн байна. Энэ нь зөвхөн олон улсын арга хэмжээнд бус жуулчдын урсгалыг нэмэгдүүлэхэд ч эерэг нөлөө үзүүлж, өдөр бүр 70 гаруй удаагийн завины аялал зохион байгуулагдаж, тасалбарын эрэлт нэмэгдээд байна.

Иранаас ирсэн жуулчин Тянжиныг уламжлал ба орчин үеийн хослол бүхий онцгой хот хэмээн үнэлсэн бол Пакистаны оюутан нутгийн иргэдийн халуун сэтгэлийг онцлон дурсжээ. Хотын захиргаа дэд бүтцээ шинэчилж, зам гүүрийн засвар, ногоон байгууламжийг нэмэгдүүлэх зэрэг ажлыг хийсэн бөгөөд 1000 орчим оюутан дипломат ёсзүй болон орчуулгын сургалтад хамрагдан сайн дурын ажилд бэлдсэн байна.

Энэ чухал уулзалт нь дэлхий дахинд тогтворгүй байдал үргэлжилж буй үед бүс нутгийн аюулгүй байдал, тогтвортой хөгжилд чиглэсэн зөв гарц олох чухал талбар болно гэж мэргэжилтнүүд онцолж байна.

Эх сурвалж: Синьхуа