Америкийн SpaceX компани наймдугаар сарын 24-нд Dragon ачааны сансрын хөлгийг Канавералын хошуунаас Falcon 9 пуужин зөөгчөөр амжилттай хөөргөж, Олон улсын сансрын станц руу (ОУСС) 33 дахь удаагаа хангамж хүргэх аяллаа эхлүүлсэн байна.

Энэ удаагийн нислэгээр ОУСС-д нийт 2300 кг ачаа хүргэсэн бөгөөд хүнс, тоног төхөөрөмжөөс гадна станцын тойрог замыг өргөхөд ашиглах нэмэлт шатахуун ч нийлүүлжээ. Dragon C211 хөлгийн хувьд энэ нь гурав дахь удаагийн нислэг бөгөөд 2022 оны арваннэгдүгээр сараас хойш дахин ашиглагдаж буй юм.

Falcon 9 зөөгчийн эхний хэсэг хөөрснөөс найман минут дөчин секундын дараа Атлантын далай дахь платформ дээр амжилттай буусан нь долоо дахь удаагийн буулт байлаа. Харин хоёр дахь шат нь хөлгийг тойрог замд гаргасан байна.

Энэхүү хангамжийн нислэг SpaceX болон NASA-гийн хамтарсан гэрээний хүрээнд хийгдсэн бөгөөд компанийн олон дахин ашиглах хөлөг сансрын станцын үйл ажиллагаанд тогтмол дэмжлэг үзүүлж буйг харуулж байна. ОУСС 2030 он хүртэл ашиглагдах төлөвтэй боловч Оросын тал түүний ажиллагааг зогсоох санал гаргаад байгаа юм.

Эх сурвалж: SpaceX, Vokrugsveta.ru.