Ромын Пап Францискийг оршуулах ёслолтой холбогдуулан дөрөвдүгээр сарын 26-нд явагдахаар байсан Италийн хөлбөмбөгийн Сери А лигийн 34 дүгээр тойргийн тоглолтуудыг хойшлуулахаар шийдвэрлэсэн талаар Италийн Иргэний хамгаалалт, далай тэнгисийн хэрэг эрхэлсэн сайд Нелло Музумечи мэдээллээ.

Анх төлөвлөснөөр бямба гарагт болох байсан Комо – Женоа, Интер – Рома, Лацио – Парма багуудын гурван тоглолт хойшлогдож байна. Football-Italia цахим хуудасны мэдээлснээр, Комо – Женоа болон Лацио – Парма багуудын тоглолт ням эсвэл даваа гарагт явагдаж магадгүй бол Интер, Рома багууд олон улсын тэмцээнд оролцож буй тул тэдний тоглолтын шинэ товыг гаргахад хүндрэл учирчээ.

Италийн Засгийн газар мягмар гарагт хуралдаж, Пап Францискийг таалал төгссөнтэй холбоотойгоор тав хоногийн гашуудал зарласан юм. Үүнээс өмнө 33 дугаар тойргийн Торино – Удинезе, Кальяри – Фиорентина, Женоа – Лацио, Парма – Ювентус багуудын тоглолтууд ч мөн хойшлогдож, дөрөвдүгээр сарын 23-нд шилжүүлэгдсэн байна.

Италийн хөлбөмбөгийн холбооноос оршуулах ёслолын үеэр улсын хэмжээнд эмгэнэл илэрхийлж, зохион байгуулалтын хүндэтгэл үзүүлэх үүднээс энэхүү шийдвэрийг гаргасан хэмээн онцолжээ.

Эх сурвалжууд: ТАСС, Football-Italia