2025 оны анхны хуралдаанаа Замын хөдөлгөөний аюулгүй байдлын Үндэсний зөвлөл өнөөдөр Төрийн ордны “Нутгийн удирдлагын танхим”-д зохион байгууллаа. Дүрмийн 2.5-д заасны дагуу зохион байгуулагдсан уг хуралдаанаар замын хөдөлгөөний аюулгүй байдлыг хангах чиг үүрэг бүхий байгууллагуудын хамтын ажиллагааны өнөөгийн байдал, тулгамдсан асуудлууд, тэдгээрийг шийдвэрлэх арга замын талаар онол, практикийн үндэслэлтэй хэлэлцүүлэг өрнүүлсэн байна.

Зам, тээврийн хөгжлийн сайд Б.Дэлгэрсайхан хуралдааны үеэр хэлэхдээ, НҮБ-аас 2020-2030 оныг “Замын хөдөлгөөний аюулгүй байдлыг хангах жил” болгон зарласныг Монгол Улсын Засгийн газар дэмжиж, стратеги, хөтөлбөр хэрэгжүүлсэн ч ослын тоо буурахгүй байгаа нь цогц төлөвлөлтийн дутагдал, хуучирсан тээврийн парк, зохион байгуулалтын оновчгүй байдалтай холбоотой гэдгийг онцлов.

Тухайлбал:

• Баруун талдаа хүрдтэй тээврийн хэрэгслийн тоог бууруулах

• Тээврийн хэрэгслийн парк шинэчлэлт хийх

• Хот, суурин газрын хөдөлгөөний ерөнхий зохион байгуулалтыг боловсронгуй болгох

• Хүний амь нас хохирсон осол нэмэгдэж буйг онцгой анхаарах шаардлагатай байгааг дурдсан юм.

Статистикийн мэдээллээс үзэхэд:

• Сүүлийн 5 жилд 124,000 зам тээврийн осол бүртгэгдэж, 43.5 тэрбум төгрөгийн хохирол учирсан

• 2534 хүн амь насаа алджээ. Үүнээс 312 нь хүүхэд

• 14905 хүн гэмтэж, тэдний 3861 нь хүүхэд

• Зам тээврийн ослын 98 хувь нь жолоочийн буруугаас болсон

• 2024 онд нийт 3.07 сая зөрчил илрүүлж, 28155 согтуу жолооч, 20 мянган жолооч эрх хасуулсан, 650 хүн баривчлагдсан байна

Хуралдааны үр дүнд дараах чиглэлээр ажил хэрэгжүүлэх зөвлөмжийг гаргав:

• Хуулийн зарим заалтад шинэчлэл, нэмэлт өөрчлөлт оруулах

• Аюулгүй байдлын бодлогыг цогц, үр нөлөөтэй болгох

• Судалгаа, сургалт, урьдчилан сэргийлэх ажлыг эрчимжүүлэх

• Иргэд, олон нийтийг хамарсан сургалт, уриалга, сурталчилгаа өрнүүлэх

• Орон нутгийн төлөвлөгөөнүүдийг ослоос сэргийлэх бодлоготой уялдуулах

Энэхүү зөвлөмжийг хэрэгжүүлэх нь замын хөдөлгөөний аюулгүй байдлыг системтэйгээр сайжруулж, хүний амь нас, эд хөрөнгийн хохирлыг бууруулахад чухал үр нөлөөтэй гэж үзэж байна.

Эх сурвалж: Замын хөдөлгөөний аюулгүй байдлын Үндэсний зөвлөл