Боловсрол, соёл, шинжлэх ухаан, спортын сайд Ц.Цогзолмааг өнөөдөр танхимынх нь тэргүүн үүрэгт ажлаас нь чөлөөлсөн. Гэвч мань хүн үүнд нэг их гонсойхгүй байгаа бололтой. Та яагаад танхимынхаа эсрэг гарын үсөэг зурсан юм бэ? гэсэн сэтгүүлчийн асуултад “Ийм тохиолдол байдаг шүү дээ. Ерөнхий сайд ч гэсэн Шадар сайд байхдаа өөрийнхөө танхимын эсрэг гарын үсэг зурж байсан. Ерөнхийлөгч Х.Баттулга хүртэл өөрийн танхимын эсрэг гарын үсэг зурж байсан. Энэ бол улс төрд байдаг процесс” хэмээн хариулав. Үүгээрээ мань хүн “юу тарина, түүнийгээ хураана” гэдэг үгийг утгыг Ерөнхийлөгч, Ерөнхий сайд хоёрт сануулав бололтой. Тэр мөн “Би өөрийнхөө гаргасан шийдвэр дээр хатуу зогсоно. Засаг чинь үлдчихсэн юм чинь намайг аваад үлдээч гэж хэлэхгүй. Чөлөөлөгдөх өргөдлөө ч өгөх шаардлагагүй. Танхим шийдвэрээ гаргаад л явчихна” гэснээс үзвэл Ерөнхий сайдын шийдвэрт бэлтгэлтэй байсан бололтой. Ер нь дахиад зуруулсан ч дахиад зурна аа л гэж байна.
Харин Зам тээврийн хөгжлийн сайд Я.Содбаатар өнөөдөр хэвлэлийнхэнд мэдээлэл хийхдээ “Би Ерөнхий сайдын хийж буй шударга ёсны тэмцэлд нэгдэж сайн дураараа ажлаа өгч байна. Өөрийн эрхэлсэн ажилтай холбоогүйгээр ёс зүйн хариуцлага хүлээсэн анхны хүн би боллоо” гэж балайрсан байна. Мөн сайдын гэр бүлийн хүн ЖДҮХС-гаас зээл авсан ББСБ-ын 25 хувийг эзэмшдэг гэдгийг ч хүлээн зөвшөөрөв. ЖДҮ-ийн зээлийн асуудлаас болж Засгийн газар нь огцрохдоо тулаад арай чүү дэнжигнэж үлдсэн байхад “Шударга ёсны тэмцэлд сайн дураараа нэгдлээ” гэж хэлээд зогсч байдаг, овоо том “ширэн нүүр” ээ...
Б.ГАЛ