Дани улсын Засгийн газар эмэгтэйчүүдийг заавал цэргийн алба хаалгахаар хууль тогтоомжоо шинэчилж баталжээ. Тодруулбал, Батлан хамгаалахын сайд Троэльс Лунд Поульсен мэдэгдэхдээ, 18 нас хүрсэн эмэгтэйчүүдийг 2025 оны долоодугаар сарын 1-нээс эхлэн цэрэгт татаж эхэлнэ гэдгийг онцлон тэмдэглэсэн байна.

Анх 2027 оноос хэрэгжүүлнэ хэмээн төлөвлөж байсан уг шийдвэрийг батлан хамгаалах, аюулгүй байдлын нөхцөл байдалтай уялдуулан хугацаанаас нь өмнө хэрэгжүүлэхээр болсон байна. Сайдын хэлснээр, зэвсэгт хүчинд илүү олон хүн шаардлагатай байгаа тул эмэгтэйчүүдийн цэрэг татлагыг эрэгтэйчүүдийн нэгэн адил албан журмаар зохион байгуулах хэрэгтэй гэж үзжээ. Ийнхүү 2025 оноос эхлэн эрэгтэй, эмэгтэй хүмүүсийн тэгш эрхийн үндсэн дээр цэрэг татлагыг явуулж эхлэх аж.

Түүнчлэн цэргийн алба хаах хугацааг өмнөх дөрвөн сараас 11 сар болгон сунгасан байна. Одоогийн байдлаар Данийн эмэгтэйчүүд зөвхөн сайн дурын үндсэн дээр армид алба хаадаг байсан юм.

Эх сурвалж: AFP.