Өмнөд Солонгосын технологийн гигант “Samsung Electronics” компанийн гүйцэтгэх захирлуудын нэг Хан Жон Хи зүрхний шигдээсийн улмаас өнөөдөр нас барсан тухай тус компани мэдээллээ. Хан Жон Хи 1988 оноос хойш “Samsung”-д ажиллаж, телевизийн үйлдвэрт карьераа эхлүүлсэн бөгөөд тус компанийн зурагтыг дэлхийн зах зээлд гаргах үйлсэд гол үүрэг гүйцэтгэсэн хэмээн компанийн мэдэгдэлд онцолжээ.
Тэрбээр 2022 онд гүйцэтгэх захирлаар томилогдож, “Samsung”-ийн хэрэглээний цахилгаан бараа болон хөдөлгөөнт төхөөрөмжийн хэлтсийг хариуцаж байв. Хан Жон Хи өнгөрсөн долоо хоногт болсон хувьцаа эзэмшигчдийн хурал дээр 2025 он “хүндхэн жил” байх болно гэж таамаглаж байгаагаа илэрхийлж байсан юм.
Тус компанийн удирдлагын бүтэц дотор Ли Жэ Ёны гэр бүл давамгайлсан хэвээр байгаа бөгөөд тэрбээр "Samsung"-ийн гурав дахь үеийн удирдагчаар ажиллаж байна. Хөрөнгийн биржийн мэдүүлэгт дурдсанаар, Хан Жон Хигийн дараа Жун Ён Хён гүйцэтгэх захирлаар цорын ганцаар ажиллах болсон бөгөөд түүнийг өнгөрсөн долоо хоногт томилсон байна.
Энэ харамсалтай явдал нь “Samsung”-ийн санах ойн чип үйлдвэрлэлийн салбарт сорилт нэмэгдсэн үед тохиож буй. Тус компани хиймэл оюун ухааны чипийн зах зээлд өрсөлдөгч болох SK Hynix болон Тайванийн TSMC компаниас түрүүлж чадахгүй байгаа талаар мэдэгдсэн. Мөн өнгөрсөн аравдугаар сард “технологийн өрсөлдөх чадвар болон компанийн ирээдүйтэй холбоотой сорилтууд” гарч буйг хүлээн зөвшөөрсөн билээ.
Эх сурвалж: DW.
