Жил бүрийн гуравдугаар сарын хоёр дахь пүрэв гарагт “Бөөр хамгаалах дэлхийн өдөр”-ийг тодорхой уриан дор тэмдэглэж, бөөрний өвчлөлөөс урьдчилан сэргийлэх талаар олон нийтэд мэдээлэл хүргэдэг. Энэ жил “Таны бөөр эрүүл үү” уриан дор бөөрний өвчлөлийг эрт илрүүлэх ажлыг зохион байгуулж байна.

Манай улсад бөөр, шээсний замын өвчлөл халдварт бус өвчний тэргүүлэх таван шалтгааны нэг бөгөөд эмч нар иргэдийг урьдчилан сэргийлэх үзлэгт тогтмол хамрагдахыг зөвлөж байна.

“Шиномед” эмнэлгийн Бөөр гемодиализын эмч Н.Наран-Амгалан бөөрний өвчлөл үүсэхэд нөлөөлдөг гол хүчин зүйлсийг дараах байдлаар тайлбарлав.

• Насжилт: 60-аас дээш насныхны бөөрний үйл ажиллагаа физиологийн хувьд буурдаг тул эрсдэлт бүлэгт ордог.
• Тамхины хэрэглээ: Тамхи нь судас нарийсгах үйлчилгээтэй тул бөөрний судсыг гэмтээж, үйл ажиллагааг нь сулруулдаг.
• Хоёрдогч өвчлөлүүд: Чихрийн шижин, даралт ихсэлт зэрэг өвчнүүд бөөрийг гэмтээх эрсдэлтэй тул ийм оноштой хүмүүс тогтмол үзлэгт хамрагдах шаардлагатай.
• Жоргүй эмийн хэрэглээ: Өвдөлт намдаах эм (ибупрофен, парацетамол зэрэг) удаан хугацаанд хяналтгүй хэрэглэх нь бөөрний үйл ажиллагаанд сөргөөр нөлөөлдөг.

Бөөрөө хамгаалахын тулд ус сайн ууж, шээсээ удаан барихгүй байх, бөөрөө даарахаас сэргийлэх, жоргүй эм хэрэглэхээс зайлсхийх зэрэг энгийн дадлуудыг хэвшүүлэх нь чухал. Мөн 60-аас дээш насныхан, тамхи хэрэглэдэг, архаг хууч өвчтэй хүмүүс тогтмол эрт илрүүлэгт хамрагдах хэрэгтэйг эмч нар онцолж байна.