Монгол Улсын Ерөнхийлөгч У.Хүрэлсүхийн Бүгд Найрамдах Чех Улсад хийж буй төрийн айлчлалын хүрээнд Гэр бүл, хөдөлмөр, нийгмийн хамгааллын сайд Л.Энх-Амгалан БНЧУ-ын Шадар сайд бөгөөд Хөдөлмөр, нийгмийн асуудлын сайд Мариан Юречкатай албан ёсны уулзалт хийлээ.
Монгол Улсын Засгийн газрын 2024-2028 оны үйл ажиллагааны хөтөлбөрийн үндсэн зорилтын нэг болох "Хүний хөгжлийн бодлого"-ын хүрээнд талууд дараах чиглэлээр хамтран ажиллахаар тохиролцов.
- Гэр бүл төвтэй нийгмийн хамгааллын бодлогыг сайжруулах
- Хөдөлмөрийн зах зээлийн идэвхтэй бодлогыг хэрэгжүүлэх
- Их өгөгдөлд суурилсан цахим шилжилтийг бодлого, төлөвлөлт, шийдвэр гаргалтад ашиглах
- Хөдөлмөрийн аюулгүй байдал, эрүүл мэндийн судалгааны чиглэлээр хамтран ажиллах
Мөн БНЧУ-д ажиллаж, амьдарч буй 14 мянга гаруй монгол иргэний нийгмийн хамгааллын асуудлыг шийдвэрлэх, 2023 оноос хэрэгжиж буй “Нийгмийн хамгааллын хэлэлцээр”-ийн хэрэгжилтийг сайжруулахад анхаарахаар болов.
Үүнээс гадна Чех улсад технологийн ур чадвар эзэмшсэн монгол иргэдийг эх оронд нь буцаж ирэхэд санхүүгийн дэмжлэг үзүүлэх хамтын ажиллагааны механизмыг хөгжүүлэх чиглэлээр талууд санал солилцож, хамтын ажиллагааг өргөжүүлэхээр тохиролцлоо.
Эх сурвалж: ГБХНХЯ
Сэтгэгдэл (1)