АНУ-ын Ерөнхийлөгч Д.Трамп Хятадын бүх бараанд нэмэлт татвар ногдуулсны дараа Бээжин хариу арга хэмжээ авч, Америкийн хөдөө аж ахуйн бүтээгдэхүүнд 10-15 хувийн татвар тогтоолоо. Үүнтэй холбоотойгоор Хятадын эрх баригчид “ямар ч хэлбэрийн дайнд” бэлэн гэдгээ анхааруулан мэдэгдсэн байна.
Хятадын Гадаад хэргийн яамнаас мягмар гарагт хийсэн мэдэгдэлд “Хэрэв АНУ-ын хүсэж байгаа зүйл нь дайн юм бол бид эцсээ хүртэл тэмцэхэд бэлэн байна” хэмээн онцолжээ. Энэ нь Д.Трамп Ерөнхийлөгч болсноос хойш Бээжингээс хийсэн хамгийн хатуу байр суурьтай мэдэгдэлд тооцогдож байна.
Лхагва гарагт Хятадын Төрийн зөвлөлийн Ерөнхий сайд Ли Чян батлан хамгаалахын зардлаа дахин 7.2 хувиар нэмэгдүүлэх талаар зарлаж, дэлхий даяар 100 жилд үзэгдээгүй өөрчлөлтүүд өрнөж буйг онцолсон байна. 2023 онд мөн энэ хувь хэмжээгээр өссөн бөгөөд шинжээчид энэ жилийн өсөлтийг урьдчилан таамаглаж байжээ.
АНУ-Хятадын харилцаа олон улсын анхаарлын төвд байсаар байна. АНУ-д суугаа Хятадын ЭСЯ-ны мэдээлснээр, АНУ-ын тал фентанил гэх хар тамхины нийлүүлэлтэд Хятадыг буруутгаж буй нь "Хятадын бараа бүтээгдэхүүнд ногдуулсан татварыг зөвтгөх шалтаг" хэмээн үзэж байна. Хятадын Гадаад хэргийн яамны төлөөлөгч “Айлган сүрдүүлэхээс бид айхгүй, дарамт шахалт бол Хятадтай харилцах зөв арга биш” гэж мэдэгджээ.
Хятад улс дэлхийн хоёр дахь том батлан хамгаалахын төсөвтэй бөгөөд энэ онд 245 тэрбум ам.доллар зарцуулах юм. Гэхдээ шинжээчдийн үзэж буйгаар, тус улс цэргийн зардлаа бага мэдээлдэг гэж үздэг аж.
АНУ, Хятадын хооронд худалдааны маргаан даамжирч, хоёр улсын харилцаа улам хурцдаж буй энэ үед Трамп, Ши Жиньпин нар дахин утсаар ярихаар тохирсон гэх мэдээлэл гарсан ч одоогоор тэд холбогдоогүй байна.
Эх сурвалж: BBC
