Олон улсын Олимпын хорооны (ОУОХ) ерөнхийлөгч Томас Бах энэ оны зургаадугаар сард албан тушаалаасаа буухын зэрэгцээ тус хорооны гишүүнээс огцорно гэж ОУОХ лхагва гарагт мэдээллээ.
1976 оны туялзуур сэлэмний Олимпын аварга Т.Бах ОУОХ-ны ерөнхийлөгчөөр 12 жил ажилласны эцэст энэ онд бүрэн эрхийн хугацаа нь дуусаж байгаа юм. Тэрбээр ирэх гуравдугаар сарын 20-нд сонгогдох шинэ ерөнхийлөгчид зургаадугаар сарын 23-нд ажлаа хүлээлгэн өгөхөөр болжээ.
ОУОХ-ны дүрмийн дагуу ерөнхийлөгчөөр 12 жилээс илүү хугацаанд ажиллах боломжгүй тул тэрээр хугацаагаа сунгахгүй байхаар шийдвэрлэсэн байна. Мөн 1991 оноос хойш ОУОХ-ны гишүүнээр ажиллаж буй Т.Бах нь дүрмийн дагуу 80 нас хүртлээ энэ албыг хаших боломжтой байсан ч гишүүнээсээ ч мөн татгалзаж буйгаа илэрхийлжээ.
Шинэ ерөнхийлөгчийг сонгоно
ОУОХ-ны шинэ ерөнхийлөгчийг гуравдугаар сарын 20-нд Грект болох ОУОХ-ны чуулганаар сонгох бөгөөд нэр дэвшигчдийн жагсаалтад дараах хүмүүс багтжээ:
- Себастьян Коу – Дэлхийн хөнгөн атлетикийн холбооны тэргүүн
- Кирсти Ковентри – Усанд сэлэлтийн Олимпын хошой аварга, Зимбабвегийн Спортын сайд
- Хуан Антонио Самаранч – ОУОХ-ны ерөнхийлөгч агсны хүү, Испанийн иргэн
- Давид Лаппартьян – Олон улсын дугуйн холбооны тэргүүн
- Фейсал Аль Хуссейн – Иорданы хунтайж
- Моринари Ватанабе – Олон улсын гимнастикийн холбооны тэргүүн
- Йохан Элиаш – Олон улсын цанын холбооны тэргүүн
ОУОХ-ны шинэ ерөнхийлөгч нь 2028 оны Лос-Анжелесийн Олимп болон 2032 оны Брисбэний Олимпыг удирдан зохион байгуулах үүрэг хүлээх юм.
Эх сурвалж: Reuters
