“Агаарын харилцааны тухай Монгол Улсын Засгийн газар, Кувейт Улсын Засгийн газар хоорондын хэлэлцээр”-ийг 2024 оны 1 дүгээр сарын 19-ний өдөр байгуулж, Монгол, Кувейтийн хооронд шууд нислэг үйлдэх эрх зүйн орчин бүрдлээ. Хэлэлцээрт Монгол Улсын Засгийн газрыг төлөөлж Зам, тээврийн яамны Төрийн нарийн бичгийн дарга С.Батболд, Кувейт Улсын Засгийн газрыг төлөөлж тус улсын Иргэний нисэхийн Ерөнхийлөгч Шейх Хумоуд Мубарак Аль-Жабер Аль-Сабах нар Эль-Кувейт хотноо гарын үсэг зурав.

Энэхүү хэлэлцээрээр хоёр улсын агаарын тээвэрлэгчид шууд болон коммерын хамтын ажиллагааны хүрээнд нислэг үйлдэх, цаашид Булангийн орнууд төдийгүй Европын орнууд руу шинээр нээх нислэгийн завсрын цэг болгон ашиглах, аялал жуулчлалыг дэмжих, хоёр улсын хооронд худалдаа, эдийн засгийн эргэлтийг нэмэгдүүлэх, тэр дундаа Монгол Улсаас Кувейт Улс руу хийж эхлээд буй махны экспортын логистикийн асуудлыг хөнгөвчилж, экспортыг илүү тогтмол болгоход эдийн засгийн чухал ач холбогдолтой хэлэлцээр юм. 

Гарын үсэг зурах ёслолын дараагаар хоёр талын уулзалт хийж, энэ үеэр ойрын хугацаанд шууд нислэг үйлдэж эхлэх боломжийг шуурхайлан судлах, энэ хүрээнд хоёр улсын Үндэсний агаарын тээвэрлэгч МИАТ болон Кувейт Эйрвэйс компанийн хооронд хамтын ажиллагааг эхлүүлж, санамж бичиг байгуулах асуудлаар санал солилцлоо. 

Эх сурвалж: Гадаад харилцааны яам.